ԵՐԵՎԱՆ, 17 փետրվարի — Sputnik. Մեքսիկայում գտնվող Հռոմի Ֆրանցիսկոս պապին բարկացրել է սելֆիի սիրահար մի երիտասարդ, որը փորձել է սելֆի անել պապի հետ, հաղորդում է dailymail.co.uk-ն։
Մորելիա քաղաքի մարզադաշտում ելույթից հետո երիտասարդը քաշել է պապի հագուստը և փորձել լուսանկարվել նրա հետ։ Երիտասարդի արարքի պատճառով Հռոմի պապը կորցրել է հավասարակշռությունը և քիչ է մնացել ընկնի իր դիմաց գտնվող հաշմանդամի սայլակով տղամարդու վրա:
Այդուհանդերձ, պապը թիկնազորի շնորհիվ կարողացել է կանգնած մնալ և համբուրել է տղամարդու գլուխը, բայց չի թաքցրել վրդովմունքը: Կաթոլիկ եկեղեցու ղեկավարը հորդորել է երիտասարդին. «Մի եղիր եսասեր, պետք չէ լինել եսասեր»:
Պապը մի քանի րոպե ևս շարունակել է ձեռքով ողջունել մարզադաշտում գտնվողներին, ապա հեռացել է ոչ թե զրահապատ «պապամոբիլով», այլ բաց մեքենայով:
