Գոհար Սարգսյան, Sputnik.
«Լավ» սիրտ ունենալու գրավականն առողջ սնունդն է։ Յուղոտ սնունդ, աղի չարաշահում և միրգ-բանջարեղենի բացառում. այս քայլերը բերում են նրան, որ մի օր առողջ աշխատող սիրտը սկսում է թերանալ իր «գործում»։ Դիետոլոգ Վարդանուշ Պետրոսյանը կարծում է, որ անառողջ սնվելու հիմնական պատճառները սոցիալական բնույթի են, մի քիչ էլ` անտեղյակության արդյունք։
«Քյաբաբ-խորոված ուտող հայ մարդու կերպարն այլևս չկա, նա ավելի շատ մետաֆորիկ է, քանի որ պաշտոնական տվյալով` Հայաստանում բնակչության ավելի քան 40 տոկոսը աղքատ է, նշանակում է` բնակչության մոտ 10 տոկոսն է կարողանում իրեն թույլ տալ լավ սնվել։ Մյուսները հիմնականում ուտում են շաքար պարունակող ուտելիք, կարտոֆիլ ու հացամթերք»,-ասաց դիետոլոգը։
Սրտի թշնամիներից մեկը շաքարն է։ Վարդանուշ Պետրոսյանի խոսքով` մի քանի տարի է, ինչ հայտարարվել է, որ շաքարը կոկաինից 4 անգամ ավելի ուժեղ թմրադեղ է։ Այսինքն` մարդն ինչքան ուտում է, այնքան կախվածության մեջ է հայտնվում։
«Շաքարի պահանջը չի կարող լինել առողջ։ Եթե մարդու մարմինը ցնցվում է այդ պահանջից, նշանակում է` արդեն կախվածության մեջ է։ Պարզապես մարդը պետք է այնքան գիտակից լինի, որ կառավարի ինքն իրեն»,-ասաց Պետրոսյանը։
Սրտաբան Միքայել Ադամյանը օրվա ընթացքում սրտի մի քանի վիրահատություն է անում։ Նրա խոսքով` սրտանոթային հիվանդություններն ավելի հաճախ հանդիպում են 40-անց տղամարդկանց ու 45-անց կանանց մոտ, բայց այսօր հիվանդությունը երիտասարդացել է։
«Մեր քաղաքացիների համար սննդամթերքի վրա արգելք դնելը դժվար է։ Գալիս են կոնսուլտացիայի, խորհուրդ ենք տալիս բացառել յուղոտ ու քաղցր սննդատեսակները, մեկ էլ տեսնում ես` նույն օրը ռեստորանում խախտում են խոստացածը»,-ասաց Միքայել Ադամյանը։
Sputnik Արմենիայի հարցին, թե սրտանոթային հիվանդություններն ինչու են առավել հաճախ նկատվում տղամարդկանց շրջանում, սրտաբանը կեսկատակ, կեսլուրջ պատասխանեց` կանանց պատճառով։
«Իսկ եթե ավելի լուրջ, կինը բնության մեջ առանձնահատուկ դեր ունի, նա սերունդ շարունակող է։ Կանանց հորմոնները փրկում են, որ երկար ապրեն, դրա համար կանայք ավելի քիչ են հիվանդանում և ավելի ուշ»,-ասաց Միքայել Ադամյանը։
Այս ամենին զուգահեռ մասնագետները վստահեցրին, որ քաղաքացիների շրջանում սեփական առողջությանը հետևելու դրական միտում է նկատվում։ Նրանց օգնության են գալիս անվճար սքրինինգներն ու պետպատվերի շրջանակում ստենտավորումը։ Շնչահեղձություն, գլխացավ, կրծքավանդակի ցավեր. այս գանգատներն ունենալուն պես պետք է անհապաղ դիմել բժշկի։ Ինչպես բժիշկներն են ասում, լավ է կանխարգելել, քան բուժել։
