ԵՐԵՎԱՆ, 19 փետրվարի — Sputnik. Ռուսաստանի Դաշնության ու Հայաստանի Հանրապետության կառավարությունների միջև հայկական կողմին պետական արտահանման վարկ տրամադրելու մասին համաձայնագիրը հրապարակվել է հինգշաբթի ՌԴ իրավական տեղեկատվության պաշտոնական պորտալում։
«Ռուսական կողմը հայկական կողմին 200 մլն դոլարի պետական արտահանման վարկ է տրամադրում ռուսական արտադրության ռազմական արտադրանքի մատակարարման ֆինանսավորման համար` համաձայն այս համաձայնագրի №1 հավելվածում նախատեսված ցանկի», — ասվում է փաստաթղթում։
Հավելվածի համաձայն` Հայաստանը ՌԴ-ից գնում է «Սմերչ» համազարկային կրակի ռեակտիվ համակարգեր և դրա ռազմամթերքը, «Իգլա-Ս» զենիթահրթիռային համակարգեր, «Ավտոբազա-Մ» ռադիոտեխնիկական հետախուզության համակարգեր, ՏՈՍ-1Ա ծանր հրանետային համակարգեր, 9М113М հրթիռներ, ՌՊԳ-26 նռնականետեր, Դրագունովի դիպուկահար հրացաններ, «Տիգր» զրահամեքենաներ, ինժեներական ու կապի միջոցներ։
Հայաստանի Հանրապետության պաշտպանության նախարարության ու ռազմատեխնիկական համագործակցության Դաշնային ծառայության միջև փոխադարձ գրավոր համաձայնությամբ ցանկը կարող է փոփոխվել։
Պայմանագիրը ստորագրվել է դեռևս 2015 թվականի հունիսի 25-ին, սակայն ուժի մեջ է մտել միայն փետրվարի 10-ին։
