ԵՐԵՎԱՆ, 20 փետրվարի — Sputnik, Լաուրա Սարգսյան. Հայկական գորգերն իրենց ողջ շքեղությամբ ներկայացվել էին «Տերյան» մշակութային կենտրոնում կազմակերպված ցուցադրություն-վաճառքի ժամանակ: Աշուն-գարուն հավաքածուի զգեստները, վերարկուները, կոշիկներն ու պայուսակները զարդարվել էին հայկական գորգերի գունեղ նախշերով։
Նախաձեռնության հեղինակ Լիլիթ Մելիքյանը պատմեց, որ գորգերի բոլոր տարրերն ընտրվել են ինտուիտիվ կերպով. «Նայեցինք ու այն, ինչ մեզ դուր եկավ, օգտագործեցինք երիտասարդների համար նախատեսված ժամանակակից հագուստներ ստեղծելիս»։
Հագուստի, աքսեսուրաների համար օգտագործվել են Հայաստանի տարբեր շրջանների շուրջ 27 տեսակ գորգի զարդանախշեր: Գորգագործության ոլորտի հայ փորձագետները, արվեստագետներն ու կառավարության ներկայացուցիչները դրական գնահատական են տվել հավաքածուին:
«Հավաքածուն ստեղծելիս ամենից շատ օգտագործվել է Հաղպատի տարածաշրջանի զարդանախշը՝ ծաղկախաչը թռչնապատկերներով: Այստեղ կան որոշ հատվածներ Լոռվա գորգերից, որոշ տարրեր վերցվել են 17-րդ դարի ասեղնագործությունից», — Sputnik Արմենիա թղթակցի հետ զրույցում ասաց գորգերի փորձագետ Աշխունջ Պողոսյանը:
«Տերյան» կենտրոնի մասնագետներն առաջին անգամ են գորգերի նախշազարդեր օգտագործել իրենց աշխատանքներում և հուսով են, որ իրենց համարձակ մտահղացումը դուր կգա մարդկանց։ Ցուցանմուշները ստեղծելիս հաշվի են առել հասարակության և հատկապես երիտասարդության պահանջները: Հետևաբար գներն էլ են մատչելի՝ 5000-50000 դրամ։
