ԵՐԵՎԱՆ, 23 փետրվարի — Sputnik. «Հայաստանի էլեկտրական ցանցեր» ընկերությունը հայտարարություն է տարածել և նշել, որ ընկերության աշխատանքի գերակա ուղղությունների շարքում է նախկին ժամանակաշրջանից ժառանգություն մնացած արատավոր երևույթների, այդ թվում՝ հավելագրումների և տարբեր այլ տեսակի խախտումների բացառումը։
«Բոլոր աշխատակիցներից պահանջվում է ազնիվ և մասնագիտական բարձր որակով աշխատանք: Տարաբնույթ նման երեւույթների կամ այլ փաստերի հայտնաբերման դեպքում «ՀԷՑ» համապատասխան աշխատակիցը կենթարկվի պատասխանատվության (ընդհուպ մինչեւ կհեռացվի աշխատանքից եւ կփոխհատուցի պատճառված վնասը), արձանագրված խախտումը կշտկվի և կկատարվի վերահաշվարկ»,- նշված է հայտարարության մեջ:
Ընկերություն կարծում է, որ որոշ բաժանորդների կողմից բարձրացված դժգոհությունները կարող են հետեւանք լինել այն հանգամանքի, որ նախորդ ձմռան համեմատ փոխվել է էլեկտրաէներգիայի դիմաց բաժանորդների կողմից վճարման ենթակա գումարի հաշվարկման եւ սուբսիդավորման մեխանիզմը, ինչպես նաեւ ուժեղացվել է վերահսկողությունը էլեկտրաէներգիայի առուվաճառքի գործառույթում: Վերջինիս ապացույցն է էլեկտրաէներգիայի կորուստների շուրջ 2 տոկոս նվազումը, որն այսօր հասցվել է ՀՀ հանրային ծառայությունները կարգավորող հանձնաժողովի կողմից հաստատված նորմատիվային մակարդակին:
Թյուրիմացություններից ու ապատեղեկատվությունից խուսափելու նպատակով ընկերությունը հորդորում է ներկայացնել կոնկրետ փաստեր: Բոլոր բաժանորդներն իրենց բողոքներով ու առաջարկություններով կարող են դիմել ընկերություն, նույնիսկ անձամբ հանդիպել ընկերության գլխավոր տնօրենին:
ՀԷՑ-ը պնդում է, որ յուրաքանչյուր դիմումին կտրվի հիմնավոր պատասխան:
