ԵՐԵՎԱՆ, 23 փետրվարի- Sputnik. Հենրիխ Մխիթարյանը լուրջ առաջարկ է ունեցել «Սպարտակից», և ակումբի բաժնետեր Ջևան Չելոյանցն ասել է. «Ահա քեզ թուղթ, գրիր, թե որքան ես ուզում ստանալ», բայց մարզիկի նպատակը Եվրոպան էր, ասել է Հովհաննիսյանը sovsport.ru-ին տված հարցազրույցում։
«Դեռ մինչև «Բորուսիա» գնալը նա պետք է «Շախտյորից» անցներ «Անժի»։ Նրան ֆանտաստիկ գումար պետք է տային`6 մլն եվրո, աշխատավարձը մոտավորապես այդքան պետք է լիներ։ Միջնորդավարձն աստղաբաշխական թիվ պետք է լիներ։ Եվ այնպես ստացվեց, որ «Անժի» տեղափոխվելու պատճառով ես վիճեցի Հենրիխի հետ։ Ուղղակի իսկապես ցանկանում էի իրականացնել այդ տրանսֆերը»,- ասել է Հովհաննիսյանը։
Նա նշել է, որ «Շախտյորի» ղեկավարները նույնպես հակված են եղել ռուսական «Անժիի» կողմը, բայց Հենրիխը չի համաձայնել, քանի որ ցանկացել է մեկնել Եվրոպա։ «Մի խոսքով` ցանկանում եմ ներողություն խնդրել նրանից այդ ճնշման համար և ասել նրան. «Կեցցես, որ տեղափոխվել ես Դորտմունդ և հաշվի չես առել փողը»»,- ասել է Հովհաննիսյանը։
Նախկին ֆուտբոլային գործակալը խոստովանել է` Մխիթարյանը ֆանտաստիկ է։ Այս խաղաշրջանում հայ կիսապաշտպանն անցկացրել է 33 խաղ, որոնցում խփել է 18 գնդակ և կատարել արդյունավետ փոխանցում։ Այժմ Հայաստանի հավաքականի և Դորտմունդի «Բորուսիայի» 27-ամյա կիսապաշտպանի տրանսֆերային արժեքը հասել է 27 մլն եվրոյի։
Sky Sports-ի վարկանիշի համաձայն` նա 17-րդն է այն 100 լավագույն ֆուտբոլիստների շարքում, որոնք հանդես են գալիս 5 լավագույն եվրոպական առաջնություններում։
