ԵՐԵՎԱՆ, 26 փետրվարի — Sputnik. Բունդեսթագի խմբակցություններից և որևէ մեկը չի վիճարկել Հայոց ցեղասպանության փաստը, Հանրային հեռուստաընկերության «Առաջին լրատվական» ծրագրի հետ զրույցում նշել է Շարմազանովը:
«Որևէ մեկն իրականում խնդիր չի առաջացրել, ուղղակի բանաձևը հետ է կանչվել լրամշակման: Գերմանիայի խորհրդարանի բոլոր ուժերն էլ կարևորել են Հայոց ցեղասպանության ճանաչման ու դատապարտման փաստը»,- ասել է ՀՀ ԱԺ փոխնախագահը` համոզմունք հայտնելով, որ մինչև տարեվերջ կունենանք Բունդեսթագի կողմից Հայոց ցեղասպանությունը ճանաչող բանաձև:
Քննարկման արդյունքում որոշում է կայացվել բանաձևի վերաբերյալ կազմակերպել լրացուցիչ քննարկումներ, իսկ քվեարկությունը, հնարավորության դեպքում, կազմակերպել մինչև ապրիլի 24-ը:
Գերմանիայի խորհրդարանը 2005 թվականին ընդունել է Հայոց ցեղասպանության մասին որոշում: Բունդեսթագի որոշման մեջ, սակայն, չի օգտագործվել «Հայոց ցեղասպանություն» եզրը, այլ նշվել է «հայերի կոտորածներ»: 2015 թվականի մարտին Գերմանիայի խորհրդարանի նախագահ Նորբերթ Լամերտը հայտարարել էր, որ «Օսմանյան կայսրությունում առաջին համաշխարհային պատերազմի ժամանակ՝ ողջ աշխարհի աչքի առաջ տեղի ունեցածը ցեղասպանություն էր: Եվ դա 20-րդ դարի վերջին ցեղասպանությունը չէր»:
Ապրիլի 24-ին Բունդեսթագում լսումներին ընդառաջ Գերմանիայի արտաքին գործերի նախարար Ֆրանկ-Վալտեր Շտայնմայերը հայտարարել էր, որ ինքն այն պատգամավորների կողքին է, որոնք կողմ են հայերի զանգվածային սպանությունները «ցեղասպանություն» անվանելուն: Գերմանիայի նախագահ Յոախիմ Գաուկը 2015թ-ի ապրիլի 23-ին Բեռլինի Մայր տաճարում Հայոց ցեղասպանության հիշատակին նվիրված արարողության ժամանակ իր ելույթում օգտագործել էր «ցեղասպանություն» եզրույթը:
