ԵՐԵՎԱՆ, 28 փետրվարի — Sputnik. Մասնագետները Բադեն-Վյուրտեմբերգի Ֆրայբուրգ քաղաքում հայտնաբերված Երկրորդ համաշխարհային պատերազմի տարիներին չպայթած ռումբը կվնասազերծեն: Մինչ վնասազերծման աշխատանքների ավարտը 1.6 հազար բնակիչ է տարհանվել, հայտնում է ՌԻԱ Նովոստին` հղում անելով DPA գործակալությանը:
Գործակալության տվյալներով` շինարարները 500 կիլոգրամանոց ռումբը հայտնաբերել են հինգշաբթի օրը: Մոտակայքում գտնվող համալսարանական կլինիկայի աշխատակիցները պետք է լքեին տարածքը կիրակի` տեղի ժամանակով մինչև առավոտյան ժամը 8:00-ն: Մասնագետները նախատեսում են վնասազերծման աշխատանքներն իրականացնել 11:00-ին, 10:00-ից կլինիկայի մուտքերը փակվել են:
ԳԴՀ-ում ամեն տարի վնասազերծվում է շուրջ 5.5 հազար չպայթած ռազմամթերք: Պատերազմի ժամանակ Գերմանիայի վրա թողնվել է ավելի քան 2 մլն ավիառումբ, որոնց մոտ 5 տոկոսը, այսինքն` շուրջ 100 հազարը չի պայթել:
Ամենաշատ ռումբեր նետվել են Բեռլինի (ավելի քան 68 հազար տոննա), Համբուրգի (45 հազար տոննա) վրա, ինչպես նաև Ռուրի շրջանի (շուրջ 162 հազար տոննա) տարածքում:
