ԵՐԵՎԱՆ, 1 մարտի-Sputnik. Հանրային առողջապահության խնդիրներն արդի աշխարհում չեն ճանաչում սահմաններ, նշեց նախագահ Սերժ Սարգսյանն ու ընդգծեց, որ ամբողջ աշխարհում հանրային առողջապահությունը համարվում է ազգային անվտանգության ամենակարևոր գործոններից, ինչպես նաև սոցիալ-տնտեսական քաղաքականության հաջողության կարևոր գործոններից մեկը։
Հանրապետության նախագահի խոսքով` ի հայտ եկած նոր վիրուսների համաճարակը չի սահմանափակվում մեկ պետությամբ և այսօր լրջագույն վտանգ է բոլոր պետությունների ժողովուրդների համար։ Այս և նման խնդիրները, նախագահի համոզմամբ, հնարավոր է արդյունավետորեն լուծել միայն սերտ համագործակցության, մասնագիտական փորձի փոխանակման, ոլորտի հաջողություններն ու ձեռքբերումները գործընկերների հետ կիսելու շնորհիվ։ Դրան է միտված Երևանում անցկացվող նախարարական համաժողովը։
