ԵՐԵՎԱՆ, 2 մարտի-Sputnik. Կառավարության որոշմամբ Գաբրիել Գյոզալյանը նշանակվեց Արագածոտնի, իսկ Հովսեփ Սիմոնյանը` Շիրակի մարզպետ։
Կառավարության նիստից հետո Շիրակի մարզպետը ներկայացրեց, որ շատ լավ է պատկերացնում մարզպետարանի աշխատանքը և սխալ է համարում «կադրային ջարդ» ասվածը։ Նրա խոսքով` յուրաքանչյուր քաղաքացիական ծառայող պաշտպանված է օրենսդրությամբ։
«Մարդիկ, ովքեր կաշխատեն օրենսդրության շրջանակում, խնդիր չեն ունենա, իսկ նրանք, ովքեր ի վիճակի չեն լինի բավարարել պահանջները, ցտեսություն ձեզ»,-ասաց Հովսեփ Սիմոնյանը։
Լրագրողների դիտարկմանը, թե Գյումրին ընդդիմադիր քաղաք է, քանի որ ամեն անգամ ընտրությունները դա են փաստում, Սիմոնյանը պատասխանեց.
«Դա չի նշանակում, որ ընդդիմադիր քաղաք է, Գյումրին շատ լավ քաղաք է, մեր ազգաբնակչության հետ մենք հաստատ շատ խնդիրներ լուծելու ենք»,-ասաց մարզպետը։
Մեկ այլ հարցի, թե 2017 թվականի ընտրություններից հետո մարզպետը կմնա իր պաշտոնում, Սիմոնյանը կարճ ու կոնկրետ պատասխանեց, որ սա անժամկետ համագործակցություն է։
