ԵՐԵՎԱՆ, 14 մարտի —Sputnik. Մայրաքաղաքի փողոցներում մուրացկան երեխաներ չպետք է լինեն,- ասել է քաղաքապետ Տարոն Մարգարյանը։
«Սա ամոթալի և ցավալի երևույթ է: Սակայն ցավով պետք է նշեմ, որ պարբերաբար հանդիպում ենք նման երեխաների, ինչը մտահոգիչ է բոլորիս համար: Այս ուղղությամբ լուրջ աշխատանքներ տանելու անհրաժեշտություն կա: Երեխաների իրավունքների բաժինը պետք է ակտիվ համագործակցի քաղաքապետարանի սոցիալական, հանրակրթության վարչությունների, ինչպես նաև ոստիկանության հետ»,- ասել է քաղաքապետը:
Նա հորդորել է հնարավոր ամեն բան անել, որ այդ երեխաները ոչ թե փողոցում լինեն, այլ ինչպես իրենց հասակակիցները, գնան դպրոց, սովորեն, արժանապատիվ մանկություն ունենան:
«Այցելեք այդ երեխաների ընտանիքներ, տեղում ծանոթացե՛ք նրանց ընտանիքների պայմաններին, զրուցեք ծնողների հետ ու պարզեք այդ երեխաների փողոցում հայտնվելու բուն պատճառները: Լրջորեն զբաղվե՛ք այս հարցով»,- ընդգծել է քաղաքապետը:
