ԵՐԵՎԱՆ, 15 մարտի — Sputnik. Վենետիկի հանձնաժողովը ԱԺ-ում Հայաստանի նոր ընտրական օրենսգրքի վերաբերյալ խորհրդատվություն է անցկացնում։
Ընդդիմադիր Հայ ազգային կոնգրեսը պահանջում է հրապարակել նախնական ընտրացուցակներն ու ընտրությունների ժամանակ քվեարկած անձանց ցուցակը։
Բացի այդ, խմբակցության ղեկավար Լևոն Զուրաբյանի խոսքով` պետք է չեղյալ հայտարարել վարկանիշային քվեարկության մոդելը, ընտրատարածքներում տեսախցիկներ տեղադրել, ինչպես նաև ընտրողների մատներին թանաքով հետքեր անել։
Նա ասաց, որ առայժմ չի կարող հրապարակել այն պատասխանը, որը Վենետիկի հանձնաժողովը տվել է իրենց առաջարկին, քանի որ փակ քննարկում է անցկացվել։
«Կարող եմ միայն ասել, որ տպավորիչ էր այն, թե մասնագետները որքան խորն են ուսումնասիրել մեր փաստարկները, զգացվում էր, որ նրանք շահագրգռված են», — ասաց Զուրաբյանը։
ՀՅԴ խմբակցությունն էլ հանձնաժողովի ներկայացուցիչների հետ հանդիպման ժամանակ պատրաստվում է կրկին բարձրացնել ընտրացուցակների հրապարակման հարցը։ Ավելի վաղ հանձնաժողովը մերժել էր այդ առաջակը` փաստարկ բերելով քվեարկության գաղտնիության պահպանումը։
Մինչդեռ խմբակցության ղեկավար Արմեն Ռուստամյանը նշեց, որ այդ հարցի վերաբերյալ իրենց դիրքորոշումը 2003 թվականից անփոփոխ է մնացել։
«Մենք բազմիցս խոսել ենք այդ մասին և վաղուց պահանջել ենք հրապարակել ընտրացուցակները։ Մենք մեկն ենք նրանցից, ովքեր դիմել են Սահմանադրական դատարան, և անհրաժեշտության դեպքում կրկին կդիմենք այդ քայլին։ Վենետիկի հանձնաժողովը պետք է վերանայի իր դիրքորոշումը», — ասաց Ռուստամյանը։
Հայաստանի կառավարությունը հավանություն է տվել նոր Ընտրական օրենսգրքին։ Նոր նախագծի հեղինակները վստահեցնում են, որ պատրաստ են լսել ու ընդունել կառուցողական բոլոր առաջարկները։
