ԵՐԵՎԱՆ, 16 մարտի — Sputnik. Արաբկիր վարչական համայնքի կանաչապատման ծառայության աշխատակիցը, որը չցանկացավ հրապարակել իր անունը, Sputnik Արմենիային հայտնեց, որ շինարարության ընթացքում անորակ բետոն ու ամրաններ են օգտագործել։
Դեպքի վայր ժամանած փրկարարները պարզել են, որ Ազատության պողոտայի թիվ 1/21 շենքի դիմաց փլուզվել է մոտ 15մ երկարությամբ և 8մ բարձրությամբ բետոնե հենապատը և թափված հողազանգվածի հետ փակել Սարալանջի պողոտայի երթևեկելի հատվածը: Տարածքի տեղազննման արդյունքում Ազատության պողոտայի թիվ 1/21 շենքի դիմաց՝ ասֆալտի վրա¸ նկատվել են մոտ 5մ երկարությամբ և մոտ 0,7 սմ լայնությամբ ճաքեր:
«Ինքներդ եք տեսնում` որակ չկա։ Փառք Աստծուն, որ փլուզման ժամանակ մոտակայքում ոչ ոք չի եղել»,- ասաց մեր զրուցակիցը։
Այդ ընթացքում քաղաքապետարանի կոմունալ տնտեսության աշխատակիցները ճանապարհի մաքրման աշխատանքներ էին իրականացվում։ Տրակտորները հավաքում էին ճանապարհը փակած քարերն ու ավազը, բետոնն ու ամրանները։
Երթևեկությունն ազատ էր, մեքենաներն անարգել անցնում էին այդ հատվածով։
«Ենթադրվում է, որ պատը փլվել է անորակ բետոնի ու արմատուրայի պատճառով։ Անձրևի հետևանքով առաջացած խոնավությունը նույնպես կարող է պատճառ լինել։ Կարծում եմ, որ հարակից շինությունը նույնքան անորակ է»,- ասաց Sputnik Արմենիայի զրուցակիցը։
Նրա կարծիքով` շինարարական ընկերությունը փլուզման հետևանքով կարող է զրկվել արտոնագրից։
Ինչպես հայտնում է ՀՀ ԱԻՆ-ի մամուլի ծառայությունը, առավոտյան դեպքի վայրում են գտնվել ՀՀ ԱԻ նախարար Արմեն Երիցյանը, Փրկարար ծառայության տնօրեն Սերգեյ Ազարյանը, Փրկարար ծառայության օրվա պատասխանատու Հովհաննես Խանգելդյանը¸ պաշտոնատար այլ անձինք և փորձագետներ։
