ԵՐԵՎԱՆ, 16 մարտի — Sputnik. «Ավրորա» մրցանակը հիմնել են 100 LIVES նախաձեռնության հիմնադիրները` ի երախտագիտություն նրանց, ովքեր Հայոց ցեղասպանության տարիներին փրկության ձեռք են մեկնել հայերին։ Ամենամյա այս մրցանակը ստեղծվել է մարդկության ուշադրությունը ևս մեկ անգամ ուղղելու աշխարհում այսօր տեղի ունեցող աղետներին և ոճրագործություններին, ինչպես նաև խրախուսելու այն հերոսների ջանքերը, որոնք մարդկային կյանքեր են փրկում։
100 LIVES և «Ավրորա» նախաձեռնության հաղորդակցության հարցերով տնօրեն Արմինե Աֆեյանը ներկայացրեց այն 4 հավակնորդին, որոնց մարդասիրությունը սահմաններ չի ճանաչում։
Մարգարիտ Բարանկիցե
Նա Բուրունդիի քաղաքացիական պատերազմի տարիներին հազարավոր կյանքեր է փրկել` խնամելով որբերին ու փախստականներին։ Ազգությամբ թութսի Բարանկիցեն պատերազմի սկզբում ազգությամբ հութու 72 մարդու է փրկել հետապնդումից։ Սակայն նրանց գտել են և Բարանկիցեի աչքի առաջ դաժանորեն սպանել։ Այս դաժան միջադեպից հետո մեծ հումանիստն իր կյանքը նվիրել է փախստականներին ու երեխաներին փրկելու գործին։ Նա փրկել է ընդհանուր առմամբ 30 հազար երեխայի։
Դոկտոր Թոմ Քաթինա
Ամերիկացի բժիշկը Հարավային Սուդանի հետ սահմանամերձ գոտում մշտական ներկայություն ունեցող միակ բժիշկն է։ Նա անձամբ է պատասխանատու տարածաշրջանի 500 հազար բնակչի բուժսպասարկման համար։ Սուդանի կառավարությունը բազմիցս ռմբակոծել է այդ տարածքը, բայց անձնազոհ բժիշկն օրուգիշեր հասանելի լինելու համար մշտապես ապրել է հիվանդանոցի տարածքում։ TIME պարբերականը 2015 թվականին նրան ճանաչել է ամենաազդեցիկ անհատներից մեկը։
Սայիդա Ղուլամ Ֆաթիմա
Նա իր կյանքը նվիրել է պարտքի դիմաց ֆիզիկական շահագործման ենթարկվողներին փրկելուն։ Նրա ղեկավարած կազմակերպության ջանքերով փրկվել են աղյուսի թրծման գործարաններում պարտքի դիմաց բռնությամբ աշխատող հազարավոր մարդիկ, այդ թվում` 21 հազար երեխա։ Ֆաթիմայի դեմ բազմաթիվ մահափորձեր են իրականացրել, նա բազմաթիվ անգամ ֆիզիկական բռնության է ենթարկվել։
Հայր Բեռնար Կինվին
Հոգևորական է դարձել 19 տարեկանում, երբ երկարատև բռնությունների և հիվանդության հետևանքով կորցրել է հորն ու չորս քույրերին։ Կենտրոնական Աֆրիկայի Հանրապետությունում մուսուլմանական ապստամբների և քրիստոնյա աշխարհազորի միջև քաղաքացիական պատերազմի ժամանակ նա մեծ գործ էր իրականացնում։ Հայր Կինվին ապաստարան ու բժշկական օգնություն էր տրամադրում հակամարտության երկու կողմերի տուժածներին` հետապնդումից ու մահից փրկելով հարյուրավոր մարդկանց։
«Ավրորա» մրցանակի հավակնորդներն առաջադրվել են իրենց անձնազոհության համար, դա կլինի բռնությունների դեմ պայքարը, թե պատերազմական իրավիճակում բուժօգնություն կազմակերպելը։
