ԵՐԵՎԱՆ, 23 մարտի — Sputnik. Բրյուսելի օդանավակայանում իրենց պայթեցրել են Իբրահիմ և Քալիմ էլ Բաքրաուի եղբայրները, հաղորդում է ՌԻԱ Նովոստին` հղում անելով RTBF հեռուստառադիոընկերությանը։
RTBF-ի տեղեկատվության համաձայն` եղբայրները կասկածվում են նաև Փարիզի ահաբեկչություններին առնչություն ունենալու մեջ։ Հայտնի է, որ Քալիմ էլ Բաքրաուին կեղծ փաստաթղթերով բնակարան է վարձել Բրյուսելի Ֆորե համայնքում, որտեղ մարտի 15-ին ոստիկանության հետ տեղի է ունեցել փոխհրաձգություն։
Երկու եղբայրներն արդեն հայտնվել են ոստիկանության տեսադաշտում։ Այս տարվա հունվարին նրանցից մեկին հեռակա կարգով դատապարտել են 9 տարվա ազատազրկման կողոպուտի ժամանակ ոստիկանների վրա կրակելու համար, երկրորդ եղբայրը դատապարտվել է 5 տարի պայմանական ազատազրկման 2011թ.-ին ավտոմեքենաներ գողանալու համար։
Երեքշաբթի` տեղի ժամանակով 08։00-ին երկու պայթյուն է որոտացել Բրյուսելի միջազգային օդանավակայանում։ Երկրի իշխանությունները կարծում են, որ պայթուցիկ սարքերից մեկը կարող էր գործարկել մահապարտ-ահաբեկիչը։ Երրորդ պայթյունը գրանցվել է Մալբեկ կայարանում` գնացքում։ Բելգիայի վարչապետը պայթյուններն անվանել է ահաբեկչական գործողություններ։ Հարձակման պատասխանատվությունը վերցրել է «Իսլամական պետություն» ահաբեկչական խմբավորումը։
