ԵՐԵՎԱՆ, 25 մարտի — Sputnik. Հայաստանի հավաքականի նախկին հարձակվող Յուրա Մովսիսյանը հավաքականի խաղերի ժամանակ լիարժեք չէր խաղում, ասել է Մոսկվայի «Սպարտակի» գլխավոր մարզիչ Դմիտրի Ալենիչևը «Սպորտ-Էքսպրեսին» տված հարցազրույցում։
«Իմ տեղեկություններով` Յուրան ջանք չի գործադրել հավաքականի խաղերի ժամանակ, բայց չէ՞ որ հավաքականի կազմում խաղալը մեծ պատասխանատվություն է։ Եթե դու հանդես ես գալիս ազգային թիմի կազմում ու քեզ հարյուր տոկոսով չես դրսևորում, ապա, իհարկե, ղեկավարներն իրավունք ունեն որևէ որոշում կայացնելու, ընդ որում` այդ որոշումը կարող է շատ խիստ լինել, ինչպես եղավ այս անգամ։ Ուրեմն պատճառ է եղել։ Քննարկելու ոչինչ չկա», — ասել է Ալենիչևը։
Նրա խոսքով` մարզիչն է որոշում, թե ում է պետք կանչել հավաքական։ «Սպարտակի» մարզիչի կարծիքով` շատ բան կախված է հենց Մովսիսյանից։
«Եթե նա ցանկանում է վերադառնալ, ապա պետք է իր խաղով ապացուցիչ դա», — ընդգծել է Ալենիչևը։
Նա խոստովանել է, որ ֆուտբոլիստի մոտ նվազել է մոտիվացիան, ինչը դրսևորվում էր «Սպարտակի» կազմում ընդգրկվելու սկզբում։ Հենց այդ պատճառով էլ նրանք որոշել են ֆուտբոլիստին հանձնել «Ռեալ Սոլթ Լեյքին»։
Հունվարին մոսկովյան «Սպարտակն» ու ամերիկյան «Ռեալ Սոլթ Լեյքը» պայմանավորվածություն են ձեռք բերել հարձակվող Յուրա Մովսիսյանին MLS (Ֆուտբոլի գլխավոր լիգա) ակումբ տեղափոխելու մասին։ Համաձայնագիրն ուժի մեջ կլինի մինչև 2016 թվականի դեկտեմբերի 1-ը։
Հարձակվողը «Սպարտակի» կազմում անցկացրել է 66 խաղ և 27 գոլի հեղինակ դարձել։
