ԵՐԵՎԱՆ, 26 մարտի- Sputnik. Հայաստանում ծնվող յուրաքանչյուր հազար երեխայից 18-ը լույս աշխարհ է գալիս բնածին արատով, նրանցից մեկը` սրտի արատով: Տարեկան սրտի արատով ծնվում է շուրջ 400-450 երեխա: Եվ այս թիվն առաջիկայում կարող է աճել:
Այն մասին, որ երեխան կարող է սրտի արատով ծնվել, ծնողը կարող է տեղեկանալ հղիության առաջին 21 շաբաթվա ընթացքում և ինքնուրույն որոշում կայացնել` ծննդաբերե՞լ, թե՞ հրաժարվել նման երեխային լույս աշխարհ բերելու մտքից:
Իսկ դրա համար անհրաժեշտ է անցնել գերձայնային հետազոտություն, այն էլ, որ շատ ավելի կարևոր է, գիտակ բժշկի մոտ:
«Այն սարքավորումները, որոնցով այսօր հագեցած է Հայաստանում ցանկացած հիվանդանոց, լինի դա մայրաքաղաքում, թե ամենահեռավոր շրջանում, նման հնարավորություն տալիս են, բայց հիմնականը բժշկի գիտելիքներն են»,- այսօր սրտի բնածին արատների կանխարգելմանը նվիրված առողջապահական սեմինարի ժամանակ լրագրողների հետ զրույցում ասաց բժշկական համալսարանի դոցենտ, բժիշկ-ռադիոլոգ Տիգրան Քոչարյանը:
Չնայած տեխնիկայի ու բժշկական ախտորոշիչ սարքավորումների անընդհատ արդիականացմանն ու զարգացմանը` ինչպես մեր երկրում, այնպես էլ ամբողջ աշխարհում բնածին արատների վիճակագրությունը տարեցտարի աճում է:
«Վերջին 20 տարվա ընթացքում Հայաստանում բնածին արատների թիվը գրեթե կրկնակի ավելացել է: Այսօր արդեն 1000 ծնունդներից 18-ը բնածին արատով է: Եվ այս թիվն աճի միտում ունի»,- ասաց մանկաբարձության և գինեկոլոգիայի ոլորտում ուլտրաձայնային ախտորոշման ասոցիացիայի ղեկավար, պրոֆեսոր Կարինե Թոխունցը:
Sputnik Արմենիայի հարցին, թե բնածին արատներով ծնունդներ Հայաստանի ո՞ր տարածքներում են ավելի շատ գրանցվում, բժիշկ-ռադիոլոգ Տիգրան Քոչարյանը պատասխանեց.
«Առավել խնդրահարույց են Գորիսի, Կապանի շրջանները, շուրջ երկու տարի առաջ Ալավերդու, Ստեփանավանի տարածքներն էին»:
Թե ինչով է դա բացատրվում, մասնագետը դժվարացավ պատասխանել, իսկ մեր դիտարկմանը, որ թվարկվածները ակտիվ արդյունաբերական կենտրոններ են, ուստի հնարավոր է, որ պատճառը հենց էկոլոգիական աղտոտվածությունն է, հակադարձեց. «Հայաստանը վերջերս դասվել է էկոլոգիապես ամենամաքուր 10 երկրների շարքին»:
Բնածին արատներով ծնունդները վաղ կանխարգելելու առաջին քայլը պտղի կյանքի առաջին շաբաթների ընթացքում ճիշտ ախտորոշումն է: Հայ մասնագետների գիտելիքների կատարելագործման համար այս օրերին Հայաստանում է Մեծ Բրիտանիայի համալսարանական հիվանդանոցի բժիշկ Ֆրեդ Ուշակովը: Լրագրողների հետ զրույցում արտասահմանցի մասնագետը նշեց, որ աշխարհում բնածին արատների դեպքերը կրկնակի ավելի են, քան Հայաստանում: «Յուրաքանչյուր 500 երեխայից 1-ը ծնվում է սրտի արատով»,- ասաց նա:
Այս ոլորտում աշխատող հայ բժիշկների համար այսօր Երևանում
կազմակերպվել է գիտակրթական կոնֆերանս, որը վարում է բժիշկ
Ուշակովը:
Կոնֆերանսը կազմակերպվել է ՀՀ առաջին տիկին Ռիտա Սարգսյանի և առողջապահության նախարարության աջակցությամբ:
