ԵՐԵՎԱՆ, 29 մարտի — Sputnik. Հայաստանն այսօր ԵՏՄ տարածքում ամենաէժան գազն է ստանում: Այս մասին այսօր Երևանում անցկացվող Արդյունաբերողների և գործարարների միջազգային կոնգրեսի խորհրդի նախագահության նիստում, պատասխանելով լրագրողների հարցերին, հայտարարեց Եվրասիական տնտեսական հանձնաժողովի Արդյունաբերական և ագրոարդյունաբերական համալիրի հարցերով նախարար Սերգեյ Սիդորսկին:
ԵՏՄ պաշտոնյան նաև հավաստիացրեց, որ գազի գինը որևէ կերպ չի ազդում ԵՏՄ տարածքում հայաստանյան արտադրության ապրանքների մրցունակության վրա:
«Դուք համեմատում եք ձեր տնտեսությունը ռուսականի հետ: Դուք այսօր Հայաստանում ստանում եք ամենաէժան գազը Միության տարածքում»,- ասաց Սիդորսկին՝ հավելելով, որ Բելառուսին ևս Ռուսաստանը նույն գնով է գազ վաճառում: Արդյունքում, նրա խոսքով, Հայաստանն ավելի էժան ինքնարժեքով արտադրանք է ստանում, և, օրինակ գյուղմթերքների արտադրության պարագայում՝ շնորհիվ կլիմայական պայմանների, հայկական գյուղմթերքն ավելի էժան ու մրցունակ է ստացվում:
«Եթե նախկինում ձեր գյուղատնտեսական արտադրանքը ՌԴ-ում միայն շուկաներում էր սպառվում, ապա այսօր այն արդեն իր ուրույն տեղն ունի առևտրի հեղինակավոր ցանցերում: ԵՏՄ-ն ձեզ առանց մաքսային վճարների գյուղմթերք արտահանելու հնարավորություն տվեց, որի շնորհիվ դուք ռուսական շուկայից դուրս մղեցիք այլ երկրներին, ինչպես, օրինակ՝ Թուրքիային»,- նշեց Սերգեյ Սիդորսկին:
Պաշտոնյան հիշեցրեց նաև, որ ՀՀ և ՌԴ կառավարությունների միջև ակտիվ բանակցություններ են ընթանում Հայաստանին վաճառվող գազի սակագինը նվազեցնելու ուղղությամբ:
«Ռուսաստանյան փորձագետները հայաստանցի մասնագետների հետ աշխատում են այդ ուղղությամբ, և կարծում եմ, մոտ ապագայում կունենանք որոշակի արդյունքներ»,- ասաց ԵՏՄ պաշտոնյան:
Հայաստանի Արդյունաբերողների և գործարարների միության նախագահ Արսեն Ղազարյանն էլ Sputnik Արմենիայի հետ զրույցում կարծիք հայտնեց, որ գազի սակագնի էժանացումը ապրանքի ինքնարժեքում որոշակի դրական տեղաշարժ կառաջացնի: Դա, սակայն, էապես չի ազդի հայկական արտադրության ապրանքների մրցակցության վրա:
«Հատկապես ջերմոցային տնտեսություններում արտադրված էկոլոգիապես մաքուր, մրցունակ պտուղ-բանջարեղենի գինը հնարավորություն է տալիս աշխատել արտահանողներին »,- ասաց Արսեն Ղազարյանը՝ հավելելով, որ հայաստանյան գյուղմթերքը ռուսական շուկայում մրցունակ կլիներ նույնիսկ այն դեպքում, եթե գազն ավելի թանկ արժենար:
