ԵՐԵՎԱՆ, 29 մարտի- Sputnik. Երեքշաբթի ժամը 16.20-ին տեղեկություն է ստացվել, որ Լոռու մարզի Վանաձոր քաղաքում այրվում է գազատար խողովակ, հայտնում է Արտակարգ իրավիճակների նախարարությունը։
Պարզվել է, որ Ներսիսյան և Սանկտ Պետերբուրգի փողոցների խաչմերուկում՝ թիվ 24 դպրոցի մոտակայքում, «Գազպրոմ Արմենիա» ՓԲԸ-ի Լոռու ԳԳ մասնաճյուղի գազատար խողովակից տեղի է ունեցել գազի արտահոսք՝ հրդեհի բռնկումով, ինչի հետևանքով գազի վթարային ծառայության աշխատակիցներ՝ 1980 թ. ծնված Ա. Ղ.-ն, 1950 թ. ծնված Գ. Ս.-ն, 1985 թ. ծնված Ա. Մ.-ն, 1979 թ. ծնված Գ. Գ.-ն, 1959 թ. ծնված Ա. Ե.-ն և 1982 թ. ծնված Վ. Ղ.-ն ստացել են տարբեր աստիճանի այրվածքներ:
Տուժածները տեղի ուժերով տեղափոխվել են Վանաձորի ԲԿ: Հրդեհը մեկուսացվել է ժամը 16.26-ին, մարվել՝ 16.32-ին: Հրշեջ-փրկարարներն իրականացրել են հերթապահություն՝ մինչ գազատար խողովակի ամբողջական դատարկվելը:
Վանաձորի ԲԿ-ից հայտնել են, որ բոլոր վեց ծառայողներն էլ այժմ գտնվում են բժշկական հսկողության տակ, նրանց վիճակը կայուն է: Նրանցից երկուսի վիճակը գնահատվում է թեթև, մյուս չորսինը՝ միջին ծանրության:
