ԵՐԵՎԱՆ, 30 մարտի- Sputnik. «Թումո» ստեղծարար տեխնոլոգիաների կենտրոնը, որը հայտնի է ոչ միայն Հայաստանում, այլ նաև նրա սահմաններից դուրս, ֆրանսիական We Demain ամսագրի կազմած վարկանիշում առաջին տեղն է զբաղեցրել։ Այս մասին նշված է կենտրոնի ֆեյսբուքյան էջում։
«Թումոյին» հաջորդում են Սիլիկոնային հովտի AltSchool-ը, ճապոնական Fuji Kindergarten-ը և Steve Jobs Schools-ը (ԱՄՆ)։
«Թումոն» արտադպրոցական ուսումնական նոր միջավայր է, որտեղ 12-18 տարեկան հազարավոր պատանիներ ուսանում են սեփական հանձնառությամբ: Ուղղորդվելով հմուտ մանկավարժների ու մեդիա մասնագետների կողմից՝ ուսանողներն իրականացնում են իրենց անհատական ուսումնական պլանը «Թումո» աշխարհի միջոցով՝ հատուկ մշակված ուսումնական հարթակ, որը պատրաստում է նրանց գործնական աշխատանքների համար։ Մասնագիտացված դասընթացները, դասախոսություններն ու միջոցառումները ուսանողներին հնարավորություն են տալիս կիրառել իրենց գիտելիքներն ու հմտությունները նաև առօրյա կյանքում:
Առաջին «Թումո» կենտրոնը բացվել է Երևանում Սեմա և Սիլվա Սիմոնյանների նախաձեռնությամբ 2011թ.-ի օգոստոսի 14-ին։ Կենտրոնը «Թումո» է կոչվել, որովհետև գտնվում է մեծանուն գրող Հովհաննես Թումանյանի անունը կրող զբոսայգում։
Կենտրոնը նախատեսում է ընդլայնել իր աշխարհագրությունը և մասնաճյուղեր բացել Ջավախքում, Հայաստանի մի շարք քաղաքներում, ինչպես նաև արտասահմանում։
