ԵՐԵՎԱՆ, 2 ապրիլի — Sputnik. Բելառուսի նախագահ Ալեքսանդր Լուկաշենկոն հանձնարարել է ԱԳՆ-ին և ՊՆ-ին` խորհրդակցություններ անցկացնել Հայաստանի և Ադրբեջանի հետ` Լեռնային Ղարաբաղի հակամարտության գոտում իրավիճակի վերաբերյալ, գրում է Sputnik Բելառուսը` հղում անելով СТВ հեռուստաալիքին։
«Մի քանի ժամ առաջ Բելառուսի ղեկավարի կարգադրությամբ մեր երկրի պաշտպանության նախարար Անդրեյ Ռավկովը բանակցություններ է ունեցել հայ և ադրբեջանցի գործընկերների հետ։ Նախագահի հանձնարարականի համաձայն` լուրջ աշխատանք է տարվում ամբողջ օրը բոլոր դիվանագիտական խողովակներով», — հայտնում է բելառուսական հեռուստաալիքը։
Բելառուսի արտգործնախարար Վլադիմիր Մակեյը հեռախոսով բանակցություններ է վարել Ադրբեջանի արտաքին գերատեսչության ղեկավարի հետ, մոտ ժամանակներս նման զրույց տեղի կունենա նաև Հայաստանի արտաքին գործերի նախարարի հետ։
Հեռուստաալիքը հիշեցրել է, որ Բելառուսը դեռևս 1992 թվականին հարթակ է առաջարկել հակամարտության կարգավորման համար։ «Այժմ բելառուսական դիվանագիտությունը անում է հնարավոր ամեն ինչ, որպեսզի թույլ չտա հետագա արյունահեղություն», — հայտարարվել է եթերում։
Ավելի վաղ Լուկաշենկոն Ադրբեջանի նախագահ Իլհամ Ալիևի հետ զրույցում մտահոգություն էր հայտնել ղարաբաղյան հակամարտության գոտում սրված իրավիճակի վերաբերյալ։
«Ալեքսանդր Լուկաշենկոն կոչ է արել կողմերին հակամարտությունը լուծել երկխոսության միջոցով», — նշում է СТВ հեռուստաալիքը։ Հեռուստաալիքի տեղեկատվության համաձայն` շաբաթ օրը հեռախոսազրույց է նախատեսվում հայ գործընկերոջ հետ։
