ԵՐԵՎԱՆ, 6 ապրիլի — Sputnik. Հյուսիսային ուղղությամբ կիրառվել են 82 մմ տրամաչափի ականանետներ (4 արկ), խոշոր տրամաչափի գնդացիրներ, արևելյան և հարավային ուղղությամբ կիրառվել են 66 մմ տրամաչափի ականանետներ:
«Կրակել են նաև սանիտարական մեքենայի վրա, որը մեկնել էր վիրավորներին դուրս բերելու։ Բարեբախտաբար այդ պահին մեքենայում մարդ չի եղել, անձնակազմը չի տուժել»,- ասաց Վիկտոր Առուստամյանը։
Նրա խոսքով` ապրիլի 6-ի առավոտյան հյուսիսային կողմում շուրջ 15 հոգանոց խմբեր մի քանի անգամ փորձ են արել հատել սահմանը և գրավել դիրքը, սակայն հակառակորդի փորձերը անհաջողության են մատնվել։
Առստամյանը նշել է նաև, որ ապրիլի 1-ից 6-ն ընկած ժամանակահատվածում ԼՂՀ զինված ուժերի կորուստները։ Ըստ նրա` հայկական կողմն ունի 32 զոհված, որոնցից 8-ը սպաներ, 24-ը՝ ժամկետային և պայմանագրային զինծառայողներ, 121 վիրավոր, որոնցից 24-ը սպաներ, 97-ը՝ շարքային, ժամկետային զինծառայողներ և 25 անհետ կորած:
Ապրիլի 1-ի լույս 2-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով Ադրբեջանի կողմից սանձազերծված ագրեսիվ գործողություններն ուղղված էին ոչ միայն զորամասերի, այլև խաղաղ բնակիչների դեմ։ Ապրիլի 5-ին` տեղական ժամանակով ժամը 12։00-ին ղարաբաղյան հակամարտության շփման գծում երկու կողմերից կրակոցները դադարել են։
