ԵՐԵՎԱՆ, 7 ապրիլի- Sputnik. Հայաստանն անհիմն է համարում միջկառավարական խորհրդի նիստը տեղափոխելու մասին առաջարկը, Ռուսաստանի վարչապետ Դմիտրի Մեդվեդևի հետ հանդիպման արդյունքում լրագրողներին հաղորդեց Հայաստանի վարչապետը։
Ավելի վաղ ԶԼՄ-ներում տեղեկատվություն էր հայտնվել, որ գագաթնաժողովը, որը պետք է տեղի ունենար Երևանում ապրիլի 8-ին, չեղյալ է հայտարարվել Ղազախստանի նախաձեռնությամբ, քանի որ այն կարող էին գնահատել որպես ղարաբաղյան հակամարտության կողմերից մեկին աջակցություն։ Ավելի ուշ հայտնի էր դարձել, որ նիստը տեղի կունենա ապրիլի 13-ին Ռուսաստանի մայրաքաղաքում։
«Ռուսաստանի վարչապետը նաև անդրադարձել է այդ հարցին` նշելով, որ առաջիկա 2-3 ամիսներին գագաթնաժողովը կանցկացվի Երևանում։ Այսօր երեկոյան մենք ավելի մանրամասն կքննարկենք այդ հարցը»,- ասաց Աբրահամյանը։
Հայաստանի վարչապետը նաև հայտարարել է, որ գագաթնաժողովին իր մասնակցությունը դեռ հարցականի տակ է։
