ԵՐԵՎԱՆ, 9 ապրիլի — Sputnik. Աբրահամի մենամարտը տիտղոսի պաշտպանության համար մեքսիկացի Ջիլբերտո Ռամիրեսի հետ տեղի կունենա ապրիլի 9-ի գիշերը, հայտնում է sport.news.am-ը: 24-ամյա Ռամիրեսը մինչև օրս պարտություն չունի պրոֆեսիոնալ ռինգում (33 հաղթանակ):
Աբրահամը նշել է, որ բարձր տրամադրություն ունի, տրամադրվածությունը հաղթական է:
«Երկար եմ մարզվել նախքան այս մենամարտը: ԱՄՆ-ում ևս անցա շատ լուրջ նախամենամարտային փուլ՝ սպարինգներ ու ամենօրյա մարզումներ: Շուտ էի եկել այստեղ, որպեսզի օրգանիզմս հարմարվեր ժամային գոտիների տարբերությանը, կլիմային: Ամեն ինչ կանեմ ԱՄՆ-ի ռինգում հաղթելու համար»,- ասաց մարզիկը։
Հարցին, թե հաղթելու դեպքում ո՞ւմ կնվիրի հաղթանակը, Աբրահամը պատասխանեց.
«Հաղթանակս կնվիրեմ հայ զինվորներին: Զորակցությունս եմ հայտնում մեր տղաներին՝ հայոց զինվորներին, մենք ամենաուժեղն ենք, մեզ հնարավոր չէ հաղթել»:
Աբրահամը նաև հայտնեց, որ մենամարտից հետո հնարավոր է այցելի Հայաստան և Արցախ։
