ԵՐԵՎԱՆ, 11 ապրիլի — Sputnik. ՀԾԿՀ-ն ապրիլի 13-ին նիստ կգումարի, որի օրակարգում, ի թիվս այլ հարցերի, ընդգրկված է նաև «Հայաստանի էլեկտրական ցանցեր» ընկերությանը 5 մլն դրամով տուգանելու հարցը։
Հիմք ընդունելով սպառողների բողոքները, ինչպես նաև «Սպառողների խորհրդատվական կենտրոն» ՀԿ-ի և ԱԺ պատգամավոր Էդմոն Մարուքյանի դիմումներն այն մասին, որ սպառողների էլեկտրոնային հաշվիչներն աշխատում են ժամային շեղումներով` հանձնաժողովը վարույթ է հարուցել և պարզել, որ խախտումներ իսկապես առկա են։
«Էլեկտրաէներգիայի ցերեկային սակագինը 10 դրամով թանկ է գիշերայինից: Գիշերային սակագնով հաշվարկը սկսվում է երեկոյան ժամը 11-ից, և բազմաթիվ քաղաքացիներ հոսանքի հետ կապված իրենց գործերը սկսում են կատարել այդ ժամին՝ գումար տնտեսելու նպատակով»,- Sputnik Արմենիային ասաց Էդմոն Մարուքյանը։
Սակայն պարզվում է, նշեց պատգամավորը, որ բազմաթիվ վայրերում հաշվիչները գիշերային հաշվարկի են անցնում 11-ի փոխարեն մի քանի ժամ ուշ, և խնդրից անտեղյակ բազմաթիվ քաղաքացիներ շարունակում են գիշերային ժամերի համար վճարել ցերեկային սակագին։
Հանրային ծառայությունները կարգավորող հանձնաժողովն այս հարցով դեռևա անցյալ տարի դիմել էր ՀԷՑ-ին, որտեղից հավաստիացրել էին, որ մինչև 2015 թ-ի դեկտեմբերի 1-ը կշտկեն էլեկտրոնային հաշվիչների ժամային շեղումները։
Մինչդեռ Էլեկտրաէներգիայի մատակարարման և օգտագործման կանոնների (ԷՄՕԿ) 43-րդ կետի համաձայն՝ ՀԷՑ-ը պարտավոր է տարին առնվազն 1 անգամ ստուգել հաշվիչների ժամերի ճշտությունը։ Հանձնաժողովի որոշման նախագծում ասվում է, որ «ընկերությունը չի կատարել ԷՄՕԿ-ի 43-րդ կետի պահանջները՝ խախտելով սպառողների իրավունքներն ու օրինական շահերը»։
Այս հիմքով էլ հանձնաժողովն առաջարկում է տուգանել ՀԷՑ-ին` 5 մլն դրամով։
Էդմոն Մարուքյանը կարծում է, որ ՀԷՑ-ն անհիմն հարստանալու դիմաց պարտավոր է նաև սպառողներին փոխհատուցում տրամադրել։
Հետևաբար եթե ՀԾԿՀ-ն հաստատի որոշումը, այն իրավական հիմք կհանդիսանա հետագայում նաև դատական հայցեր ներկայացնելու համար։
