ԵՐԵՎԱՆ, 12 ապրիլի — Sputnik. Գոհար Սարգսյան. Մաթիաս Քիսլերը խուսափողական պատասխան տվեց լրագրողների այն հարցին, թե ղարաբաղա-ադրբեջանական սահմանի ռազմական գործողություններում ով էր նախահարձակը։
«Ես հիմնավոր տեղեկություններ չունեմ, թե ինչպես է ամեն ինչ զարգացել ապրիլի 2-ին։ Պետք է սպասել` ինչ եզրակացություն կտան ԵԱՀԿ Մինսկի խմբի համանախագահները»,-ասաց նա։
Դեսպանի դիտարկմամբ` ռազմական գործողությունների վերսկսումը հետքայլ է մինչ այժմ խաղաղությանն ուղղված և հակամարտության խաղաղ կարգավորմանն ուղղված քայլերից։ Նրա տեղեկացմամբ` Դաշնային արտգործնախարար Ֆրանկ Վալտեր Շտայնմայերը, ով ղեկավարում է ԵԱՀԿ նախագահությունը, անհապաղ զանգահարել է երկու երկրների արտգործնախարարներին` հորդորելով նրանց զինադադար պահպանել։
«Մենք պետք է առաջ նայենք։ Մեզ համար կարևոր է, որ զինադադարը պահպանվի երկու կողմերում։ Պատկերացնում եմ, որ հակամարտության կարգավորումը խաղաղ ճանապարհով լուծելու ուղղությամբ նոր դինամիկա է առաջ եկել»,- ասաց Հայաստանում Գերմանիայի արտակարգ և լիազոր դեսպան Մաթիաս Քիսլերը։
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը կրակում է նաև Հայաստանի սահմանամերձ գյուղերի ուղղությամբ։
