ԵՐԵՎԱՆ, 14 ապրիլի — Sputnik. Մանրածախ առևտրային ցանցերը խտրական վերաբերմունք ունեն ԵՏՄ երկրների մատակարարների նկատմամբ, կարծում է ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը։
Այս հարցը բարձրացվել է ԵՏՀ նախարար Նուրլան Ալդաբերգենովի և ԵՏՄ երկրների հակամենաշնորհային մարմինների ղեկավարների հանդիպման ժամանակ, որն անցկացվել է Երևանում ապրիլի 14-ին։
«Տնտեսվարող սուբյեկտների հարցումների համաձայն` որոշակի սահմանափակումներ կան` կապված մանրածախ առևտրի հետ, մասնավորապես Ռուսաստանում։ Հաճախ մանրածախ առևտրի կետերը նախապատվություն են տալիս տեղական մատակարարներին այլ երկրների մատակարարների փոխարեն», — ասաց Շաբոյանը։
Այդ պարագայում հայ մատակարարներն այլընտրանք չունեն, նրանք ստիպված են ընդունել տեղական մատակարար կազմակերպությունների պայմանները։
Բացի այդ, մանրածախ առևտրի կետերը ինքնակամ իջեցնում են ապրանքների գները, երկարացնում վճարման ժամկետը և այլն։
Ապացույցներ ունենալու դեպքում նման պահվածքը կարող է համարվել հակամրցակցային։ Այդ դեպքերը պետք է կանխվեն, քանի որ դա անդրադառնում է Միության երկրների տնտեսական զարգացման վրա։
Մեկ այլ խնդիր, որի վրա ուշադրություն հրավիրեց Շաբոյանը, համատեղ թվային ստորագրության ընդունման բացակայությունն է, ինչը խոչընդոտում է, որպեսզի Հայաստանում գործող ընկերությունները մասնակցեն Ռուսաստանում պետական գնումներին։
ՏՄՊՊՀ ղեկավարը նաև ուշադրություն դարձրեց տեղեկատվական կենտրոններ ստեղծելու անհրաժեշտությանը նրանց համար, ովքեր ցանկանում են ԵՏՄ երկրների տարածքում գործունեություն ծավալել։
Քննարկման մյուս մասնակիցները համաձայնեցին Շաբոյանի առաջարկի հետ` ասելով, որ հնչեցված թեմաներն արդիական են ոչ միայն Հայաստանի, այլև ԵՏՄ մյուս երկրների համար։
