ԵՐԵՎԱՆ, 14 ապրիլի — Sputnik. Մոսկվայի Զամոսկվորեցկի դատարանը հինգշաբթի 4 տարի ազատազրկման դատապարտեց գործարար և «Սոբեսեդնիկ» ՀՏ տնօրեն Լևոն Հայրապետյանին` Իգոր Իզմեստևի մորից գումար հափշտակելու համար։
«Այն փաստարկներին, որ Հայրապետյանը չի վերցրել նշված գումարը, դատարանը կասկածով է վերաբերվում։ Փաստերի առկայությունը վկայում է այն մասին, որ Հայրապետյանը մեղավոր է։ Ամբաստանյալի համար նշանակել պատիժ` 4 տարի ազատազրկում։ Հայրապետյանից գանձել 20.8 մլն ռուբլի տուժածի օգտին», — գրված է դատավոր Լարիսա Սեմյոնովայի որոշման մեջ։
Այսպիսով` դատարանը գործարարին մեղավոր ճանաչեց Իզմեստևի մորից խաբեությամբ գումար շորթելու մեջ։
Գործարարին այդ գումարը, ինչպես պարզեց դատարանը, փոխանցվել էր Իզմեստևին ցմահ չդատապարտելու հարցը լուծելու համար։ Հայրապետյանը կալանավորվեց դատարանի դահլիճում։
Ավելի վաղ պետական մեղադրողը խնդրել էր գործարարին ազատազրկել 7 տարով ընդհանուր ռեժիմի գաղութում, ինչպես նաև նրանից գանձել 20.8 մլն ռուբլի։
Փաստաբան Դավիթ Խեչյանը հայտնել է ՌԻԱ Նովոստիին, որ Հայրապետյանի պաշտպանը բողոքարկելու է դատավճիռը։
«Մենք, բնականաբար, բողոքարկելու ենք վճիռը։ Հայրապետյանն ընդհանուր առմամբ 1 տարի և 2 ամիս է անցկացրել տնային կալանքի տակ և մեկուսարանում, ինչը կհանվի դատավճռի ժամկետից», — հայտնել է փաստաբանը։
Քննության տվյալներով` գործարարը խաբել է ահաբեկչության և այլ ծանր հանցագործությունների համար ցմահ դատապարտված Իզմեստևի մորը` խոստանալով նրա որդու համար 700 դոլարի դիմաց ավելի մեղմ դատավճիռ ստանալ։
