ԵՐԵՎԱՆ, 18 ապրիլի- Sputnik. Հայաստանը և Ադրբեջանը պետք է քաղաքական կամք դրսևորեն, որպեսզի հասնեն հակամարտության խաղաղ կարգավորման, ասել է ԵԽԽՎ ղեկավար Պեդրո Ագրամունտը։
«Անընդունելի է, որ բեռլինյան պատը քանդելուց 25 տարի անց եվրոպական ընտանիքի անդամները նախկինի նման հակամարտությունների մեջ են։ Այս ամսվա սկզբին Լեռնային Ղարաբաղում կրկին տեղի է ունեցել հակամարտության բռնկում, ինչը հանգեցրել է շփման գծում մարդկային զոհերի, այդ թվում` քաղաքացիական»,- ասել է նա` բացելով գարնանային նստաշրջանը։ «Ես դատապարտում եմ բռնությունը և ցավակցում մարդկային զոհերի առիթով»,- հավելել է նա։
Ագրամունտն ընդգծել է, որ «միջազգային հանրության կողմից բռնությունը դադարեցնելու հստակ կոչերի շնորհիվ առկա է հրադադարի մասին երերուն պայմանավորվածություն»։ ԵԽԽՎ ղեկավարը համոզմունք է հայտնել, որ երկու կողմերը պետք է ապահովեն լարվածության թուլացում և դադարեցնեն կրակը։
«Ինչպես Հայաստանը, այնպես էլ Ադրբեջանը պետք է կատարեն Եվրոպայի խորհուրդ մտնելիս ստանձնած պարտավորությունները և քաղաքական կամք դրսևորեն, որպեսզի հասնեն հակամարտության կարգավորման»,- ասել է Ագրամունտը։
Նա հիշեցրել է, որ ԵԽ-ն ղարաբաղյան հակամարտության կարգավորման անմիջական մանդատ չունի, սակայն ենթադրել է, որ խորհրդարանական դիվանագիտությունը կարող է օգնել դիրքորոշումների մերձեցմանը։
«Այս հարցը շարունակելու է ինձ համար մնալ առաջնայիններից մեկը»,- եզրափակել է նա։
