ԵՐԵՎԱՆ, 20 ապրիլի — Sputnik. Թուրքական իշխանություններն արգելել են Sputnik Թուրքիայի գլխավոր խմբագիր Թուրալ Քերիմովին լքել օդանավակայանը` զրկելով նրան կացության իրավունքից առանց պատճառները պարզաբանելու:
«Սահմանային վերահսկողության աշխատակիցը վերցրեց անձնագիրս և ուղեկցեց ինձ ուղևորների զննման կետ, որտեղ ինձ մոտ մեկ ժամ պահեցին՝ առանց պատճառը բացատրելու։ Հետո ինձ տվեցին թուղթ, որի վրա գրված էր, թե իմ մուտքը Թուրքիա արգելվում է։ Թղթում որևէ բացատրություն չկար։ Իմ մոտից առգրավեցին նաև այցեքարտն ու կեցության իրավունքը, ինչից հետո ինձ առաջարկեցին առաջին իսկ չվերթով վերադառնալ Ռուսաստան», — ասել է Քերիմովը։
Նա ավելացրել է, որ միջադեպը տեղի է ունեցել Ստամբուլի Աթաթուրքի անվան օդանավակայանում։
Քերիմովը հայտնել է, որ ինքը գտնվում է ժամանած ուղևորների զննման բաժնի սպասասենյակում:
Անցյալ հինգշաբթի Թուրքիայում արգելափակվել էր ռուսական Sputnik գործակալության կայքը։ Շաբաթ օրը տեղի լրատվամիջոցները հաղորդել էին, որ Անկարայի Գյոլբաշի շրջանի շրջանային դատարանը հաստատել է Թուրքիայի հեռահաղորդակցության և կապի վարչության որոշումը՝ երկրի տարածքում մի շարք կայքեր, այդ թվում` ռուսական Sputnik —ն արգելափակելու վերաբերյալ։ Համապատասխան պահանջով գերատեսչություն էր դիմել Թուրքիայի կառավարությանն առընթեր անվտանգության հարցերով զբաղվող գլխավոր վարչությունը:
