ԵՐԵՎԱՆ, 21 ապրիլի- Sputnik, Լաուրա Սարգսյան. «Նարեկացի» մշակութային կենտրոնը մարդաշատ էր. էթնիկ երաժշտության երկրպագուները հավաքվել էին վայելելու երաժիշտներ Ջորջ Գազազյանի և Պատրիսիա Դրագերի կատարումները։
Եգիպտոսից և Շվեյցարիայից ժամանած երաժիշտները 50 րոպե շարունակ կատարեցին Ջորջ Գազազյանի «Կղզիների խումբ» ստեղծագործությունը։
Գազազյանն իր երաժշտական գործունեությունը սկսել է Եգիպտոսում որպես երգիչ և միայն որոշ ժամանակ անց` արդեն 25 տարեկան հասակում, սկսել է ուդ (լարային կսմիթահար գործիք) նվագել։
«Ես միշտ ուզել եմ որևէ երաժշտական գործիք նվագել, բայց նման հնարավորություն չեմ ունեցել և միայն երգել եմ։ Առաջին գործիքս կիթառն է եղել։ Փորձեցի, ստացվեց։ Ու այդպես սկսվեց…»,- Sputnik Արմենիայի թղթակցի հետ զրույցում ասաց Գազազյանը։
Երաժիշտի խոսքով` սկիզբը բարդ է եղել, քանի որ ո՛չ համապատասխան կրթություն է ունեցել, ո՛չ էլ` փորձ։
Նա պատմեց, որ իր ընտանիքը Եգիպտոս է հասել` փրկվելով 1915թ.-ի ջարդերից, բայց խոստովանեց, որ դժբախտաբար չգիտի, թե իր նախնիներն ինչպես են կարողացել փրկվել մահից։
Ուդը լարավոր-կսմիթային նվագարան է, ծագել է պարսկական բարբաթից, դարձել արաբական երկրների ժողովրդական գործիքարանի հիմնական նվագարանը, նաև արաբական երաժշտության տոնայնական համակարգը ներկայացնելու և տեսականորեն բացատրելու հիմնական միջոցը։ Լայնորեն տարածվել է Մերձավոր Արևելքի երկրներում, Միջին Ասիայում և Հայաստանում։ Մատենադարանում ուդի մի քանի նմուշ է ներկայացված։ Հայկական ուդը 6 լարանի է (առաջին հինգը՝ զույգ-զույգ), լարվածքը՝ կվարտա-սեկունդային։ Արևելքի երկրներում ուդիի նվագացանկն ավանդական է (մակամներ և նման եղանակներ)։ Հայ կոմպոզիտորներն այն հարստացրել են հայկական ազգային բնորոշ հնչողություն ունեցող երկերով։ Փորձագետները կարծում են, որ կիթառի նախահայրը հենց ուդն է։
