ԵՐԵՎԱՆ, 22 ապրիլի — Sputnik. Թմրանյութերը չարաշահելու համար Փրինսին բուժօգնություն էին ցուցաբերել մահից վեց օր առաջ, հայտնում է ՌԻԱ Նովոստին` հղում անելով TMZ լրատվական կայքին։
Փրինսի մահվան պատճառը դեռ պարզ չէ։ Հայտնի է միայն, որ մի քանի օր առաջ երգիչը հիվանդանոց էր տեղափոխվել հարբուխի աշխանշաններով։ Երգիչն օդանավում էր եղել, երբ նրա ինքնազգացողությունը կտրուկ վատացել էր, և այդ պատճառով ինքնաթիռը շտապ վայրէջք էր կատարել Իլինոյս նահանգի Մոլին քաղաքում։ Սակայն հենց հաջորդ օրը նա արդեն համերգ էր տվել։
Լրագրողները կասկածի տակ են առել մրսածության վարկածը, քանի որ ինքնաթիռը չնախատեսված վայրէջք էր կատարել Փրինսի տուն հասնելուց ընդամենը 48 րոպե առաջ։
Պարբերականը հայտնում է, որ բազմաթիվ աղբյուրներից ստացած տվյալների համաձայն` երգիչը թմրանյութերի չարաշահման պատճառով բուժում է ստացել հիվանդանոցում։
«Ներկա պահին իրավապահ մարմինները բարձրացնում են հիվանդանոցի արխիվային գրառումները, ինչը հավանաբար կօգնի պարզել մահվան պատճառը», — նշում է կայքը։
Փրինսը հայտնի ամերիկացի երգիչ է, կիթառահար, կոմպոզիտոր և բազմաթիվ երգերի հեղինակ։ Ծնվել է 1958 թվականին Մինեապոլիս քաղաքում։ Նա «Գրեմմի», «Օսկար» և «Ոսկե գլոբուս» մրցանակների դափնեկիր է։ 2005 թվականին Փրինսի անունը ներառվել է ռոքնռոլի Փառքի դահլիճի անդամների ցանկում։
