ԵՐԵՎԱՆ, 24 ապրիլի — Sputnik. ՌԴ ԱԳ նախարար Սերգեյ Լավրովը ԼՂ խնդրի խաղաղ կարգավորման առաջարկությունների փաթեթ Հայաստան չէր բերել։ Այս մասին Ծիծեռնակաբերդի հուշահամալիր այցելությունից հետո լրագրողներին ասաց ՀՀ ԱԳ նախարար Էդվարդ Նալբանդյանը։
«Լավրովն ինքը հայտարարեց, որ այսօր պետք է ջանքերն ուղղված լինեն հետաքննությունների մեխանիզմների ստեղծմանը, այլ մեխանիզմների հայթայթմանը, որպեսզի կայունություն ստեղծվի, ապահովվի անվտանգությունը և հնարավոր լինի ավելի հարմար ու նպաստավոր պայմաններում բանակցությունները շարունակել»,- ասաց նա:
«Այն առաջարկները, որոնք արվել էին, եթե դրանք ձեռնտու լինեին Ադրբեջանին, ապա նա չէր մտնի փակուղի: Ձախողվեց բանակցություններում, դրա համար փորձեց ռազմական ճանապարհով լուծումներ գտնել և ձախողվեց»,- ասաց Նալբանդյանը` հավելելով, որ Ադրբեջանը ստիպված է լինելու վերադառնալ բանակցությունների սեղան, քանի որ այլընտրանք չկա:
Իսկ միջազգային հանրությունն, ըստ Էդվարդ Նալբանդյանի` պետք է ամեն ինչ անի Ադրբեջանին կառուցողական դաշտ բերելու համար։