ԵՐԵՎԱՆ, 24 ապրիլի — Sputnik. Հայ նշանավոր կոմպոզիտոր Տիգրան Մանսուրյանը վստահ է, որ Ցեղասպանության 101-րդ տարում և դրանից հետո պետք է արդար լուծում պահանջելու ուղղությամբ ավելի մեծ եռանդ ներդրվի:
«Նոր հարյուրամյակ մտանք, և մեզնից դիմադրության ավելի մեծ եռանդ է պահանջվում, նոր ուղիներ պիտի որոնենք` մեր հարցի վերաբերյալ արդար լուծում պահանջելու ուղղությամբ: Նոր հարյուրամյակի սկզբին ինձ ուրախացնում է «Ավրորա» մրցանակաբաշխության անցկացումը: Շատ կարևոր բան է, շատ լավ կլիներ, եթե նման ծրագրերը բազմապատկվեին: Մենք հնարավորություն կունենայինք առավել գործուն ներկայություն ունենալ միջազգային ասպարեզում»,- ասել է Տիգրան Մանսուրյանը «Արմենպրեսին»։
Կոմպոզիտորի խոսքով` ինքը մի քանի օր առաջ Գերմանիայում է եղել, որտեղ Մյունխենի կամերային նվագախմբի և Բեռլինի «Ռիաս» կամերային երգչախմբի մասնակցությամբ ձայնագրվել է Հայոց ցեղասպանությանը նվիրված իր «Ռեքվիեմը»:
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
