ԵՐԵՎԱՆ, 27 ապրիլի — Sputnik. Զինվորներից մեկը ծանր վիճակում է: Այդ մասին լրագրողներին հայտնեց Հայաստանի պաշտպանության նախարարության ռազմաբժշկական վարչության պետ Կամավոր Խաչատրյանը:
«Վնասվածքը զինվորականի կյանքին չի սպառնում։ Ծանր է համարվում, որովհետև վնասվել է կոնքոսկրը, և լուրջ վիրահատություն անհրաժեշտ կլինի»,- ասաց Խաչատրյանը:
Մյուս երկուսի վիճակը գնահատվում է բավարար. մեկն ուղեղի ցնցում է ստացել, իսկ մյուսը` թոքի բեկորային վնասվածք:
Խաչատրյանը հայտնեց նաև, որ ապրիլի 1-ից 4-ի ընթացքում գրանցված 125 վիրավորներից 87-ն արդեն դուրս է գրվել հիվանդանոցից, ծայրահեղ ծանր է շարունակում մնալ 3-ի վիճակը, իսկ 5 հոգու կյանքը, ցավոք, չի հաջողվել փրկել:
«Այս ընթացքում վիրավորներին առաջնագծում օգնություն ցուցաբերելիս հակառակորդը նպատակային կրակահերթ է արձակել շտապ օգնության 4 մեքենայի վրա։ Մեկը պայթեցրել են, բայց, բարեբախտաբար, բուժանձնակազմը մեքենայից դուրս օգնություն ցուցաբերելիս է եղել վիրավորներին: Մյուս 3 մեքենայի վրա էլ կրակել են տարբեր տրամաչափի հրազենային զենքերով: Վիրավորներ ունեցել ենք, բայց մահվան դեպքեր՝ ոչ»,- ասաց ՀՀ ԶՈՒ ռազմաբժշկական վարչության պետը։
Ապրիլի 26-ի օրվա ընթացքում ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդի կողմից ձեռնարկված ինտենսիվ հրետակոծությունները շարունակվել են նաեւ այս գիշեր: Ադրբեջանական զինուժը իր տրամադրության տակ եղած գրեթե բոլոր հրետանային զինատեսակներից, այդ թվում` ականանետներից, թնդանոթներից ու ՄՄ- 21 (Գրադ) կայանքներից ղարաբաղյան դիրքերի եւ խաղաղ բնակավայրերի վրա արձակել է ավելի քան 550 արկ: Առավել ինտենսիվ հրետակոծություններ են արձանագրվել շփման գծի հյուսիսարեւելյան ուղղությամբ: Հրետակոծության են ենթարկվել Մարտակերտ, Ներքին Հոռաթաղ եւ այլ խաղաղ բնակավայրեր:
Հակառակորդի կողմից ձեռնարկված ագրեսիվ գործողությունների հետևանքով մահացու վիրավորում է ստացել ՊԲ զինծառայող, 1996թ.-ին ծնված Հայկ Սամվելի Մինասյանը:
