ԵՐԵՎԱՆ, 27 ապրիլի — Sputnik. «Գազպրոմ Արմենիա» ընկերությունը ՀԾԿՀ դեռ չի դիմել, բայց մտադիր է դիմել`գազի սակագնի վերանայման հայտով։ Sputnik Արմենիային հայտնեց ընկերության մամուլի քարտուղար Շուշան Սարդարյանը:
Ընկերությունը հանձնաժողովին առաջարկելու է 1000 խորանարդ ﬔտր գազի սակագինն իջեցնել՝ դարձնելով 146 700 դրամ՝ ներկայում գործող 156 000 դրամի փոխարեն։ Իսկ բնակիչ- բաժանորդների համար գազի 1 խմ-ի սակագինն այդ պարագայում կնվազի 9.3 դրամով` ներկայիս 156 դրամի փոխարեն սահմանելով 146,7 դրամ:
«Իրազեկ և պաշտպանված սպառող» ՀԿ նախագահ Բաբկեն Պիպոյանը Sputnik Արմենիայի հետ զրույցում փաստեց, որ ՀԾԿՀ-ն երբեք սեփական նախաձեռնությամբ սակագնի վերանայման գործընթաց չի նախաձեռնել։
«Երբեք հանձնաժողովը չի ասել` եկեք տեսնենք էժանացնելու տեղ ունեք, թե չէ։ Միշտ բիզնեսն ինքն է ասում`եկեք էժանացնենք»,- ասաց Բաբկեն Պիպոյանը` նշելով, որ թանկացնելու դեպքում հանձնաժողովն ավելի շահագրգիռ է ու նախաձեռնող։
Հիշեցնենք` ՌԴ-ից Հայաստան ներկրվող գազի գինը սահմանին 10 դոլարով էժանացնելու մասին (165 դոլարի փոխարեն 150 դոլար) ՀՀ և ՌԴ վարչապետները հայտարարեցին ապրիլի 7-ին, Երևանում կայացած հանդիպման ավարտին։
Հայտարարությանը հաջորդած օրերի ընթացքում ՀԾԿՀ-ն պարբերաբար հայտարարում էր, որ գազի սակագնի վերանայման հայտ «Գազպրոմ Արմենիան» չի ստացել։
Ի դեպ, ՀՀ էներգետիկայի և բնական պաշարների նախարար Լևոն Յոլյանն այսօր ԱԺ-ում լրագրողներին հայտնել է, որ «Գազպրոմ Արﬔնիա» ընկերությունը ՀԾԿՀ հայտ է ներկայացրել դեռ 3 օր առաջ։ Նախարարի խոսքով` սակագնի վերաբերյալ վերջնական որոշում կկայացվի, երբ ՀԾԿՀ-ն կավարտի հայտի ուսումնասիրությունը։
