ԵՐԵՎԱՆ, 28 ապրիլի — Sputnik. Լեռնային Ղարաբաղում իրավիճակի սրման հետևանքով Հայաստանի տնտեսության վրա հնարավոր ազդեցության վերաբերյալ Համաշխարհային բանկը գնահատականներ առայժմ չունի, թեև մոնիթորինգ իրականացնում է։ Այս մասին այսօր լրագրողների հետ հանդիպմանն ասաց ՀԲ երևանյան գրասենյակի տնօրեն Լորա Բեյլին։
Վկայակոչելով այլ երկրների փորձը` նա նշեց, որ ռազմական իրավիճակի սրումը կարող է ազդել վստահության և որպես դրա հետևանք` օտարերկրյա ներդրումների վրա։
«Սակայն այդպիսի ազդեցություն մենք դեռևս չենք նկատում»,- ասաց Լորա Բեյլին` միաժամանակ ափսոսանք հայտնելով ԼՂ-ում ստեղծված իրավիճակի վերաբերյալ և ցավակցություն` դրա հետևանքով կորուստներ կրած ընտանիքներին։
Լորա Բեյլիի խոսքով` ՀԲ-ի դիտարկմամբ, Հայաստանի տնտեսությունն այս տարվա առաջին եռամսյակում նույնիսկ ավելի բարձր դինամիկա է դրսևորել, քան նախորդ տարվա նույն ժամանակահատվածում, ուստի այս պահին ՀԲ-ն Հայաստանի տնտեսության համար արված կանխատեսումը վերանայելու պատճառ չի տեսնում։
Հիշեցնենք, Համաշխարհային բանկը 2016-ին Հայաստանի տնտեսության համար ՀՆԱ-ի 1.9% իրական աճ է կանխատեսել։