ԵՐԵՎԱՆ, 29 ապրիլի — Sputnik. Որմնանկարների պահպանման ծրագրով մինչ օրս վտանգված տարածքներից տեղափոխվել և վերականգնվել է 8 որմնանկար, որից միայն 3-ը` պետական բյուջեի հաշվին, հայտնում են ՀՀ մշակույթի նախարարությունից։
2007-2016 թթ. վերականգնված և ամրակայված որմնանկարներն են Մինաս Ավետիսյանի «Թորոս Ռոսլինի ծնունդը», «Հանդիպում», «Խաչքարի մոտ», «Թել են մանում», «Երկանք», «Գորգ են գործում», «Հայկական հովվերգություն», «Հայաստան», Ռաֆայել Աթոյանի «Ջաղացի ճանապարհին», Հակոբ Հակոբյանի «Սարերում» որմնանկարները։
«Կառավարության որոշման համաձայն` անհատույց և անժամկետ օգտագործման իրավունքով որմնանկարն ամրացվեց «Գյումրու Վ. Աճեմյանի անվան պետական դրամատիկական թատրոն» ՊՈԱԿ-ին»,- ասված է հաղորդագրությունում:
Հ. Հակոբյանի «Սարերում» որմնանկարի ամրակայման, վերականգնման և տեղափոխման աշխատանքները կիրականացվեն ԱՄՆ դեսպանների մշակութային արժեքների պահպանության հիմնադրամի հատկացրած միջոցների հաշվին: 2014-2015 թթ. հիմնադրամի միջոցների հաշվին Գյումրու երիտասարդական պալատ է տեղափոխվել և վերականգնվել Ռ. Աթոյանի «Ջաղացի ճանապարհին» որմնանկարը: