ԵՐԵՎԱՆ, 29 ապրիլի — Sputnik, Լաուրա Սարգսյան. Հանրաճանաչ ջազմեն Ռիչարդ Բոնան այցելել է Երևան` Ջազի միջազգային օրվան նվիրված միջոցառումներին մասնակցելու նպատակով։
Բոնան Երևան է ժամանել ապրիլի 26-ին և արդեն հասցրել է լինել Գառնու հեթանոսական տաճարում, Գեղարդի միջնադարյան վանական համալիրում և մի շարք այլ տեսարժան վայրերում։
«Ինձ հիացրեց Գեղարդի տաճարի ակուստիկան, երբ այնտեղ ես փորձեցի երգել իմ ստեղծագործությունները», — լրագրողների հետ զրույցում ասաց Բոնան` նշելով, որ իրեն անչափ տպավորել է նաև հայկական խոհանոցը։
Բոնան 9 լեզվի է տիրապետում և խոստանում է նաև հայերեն սովորել հայաստանյան հաջորդ այցի ընթացքում, որպեսզի թարգմանչի օգնության կարիք չունենա։ Նա ոչ միայն լեզուների նկատմամբ հակում ունի, այլև` տարբեր ազգերի երաժշտական գործիքների։
Երաժիշտն այնքան տպավորված է եղել հայկական ազգային դուդուկով, որ որոշել է նաև դուդուկ նվագել։ «Լեզուն երաժշտության է նման. ես լսում եմ և արտաբերում ձայնը», — ասել է նա։
«Եթե ձկնորսի ընտանիքում ծնվեի, ապա ձկնորս կդառնայի։ Այնպես է ստացվել, որ ծնվել եմ երաժիշտների ընտանիքում և այդ պատճառով էլ այսօր երաժիշտ եմ», — Sputnik Արմենիայի թղթակցի հետ զրույցում ասաց Բոնան։
Բոնան ծնվել է արևելյան Կամերունում, և նրա առաջին գործիքը եղել է բալաֆոնը։
Բոնան չգիտի, թե ինչու է ընտրել հենց ջազային երաժշտությունը, ասում է, որ այդ ջազն է նրան ընտրել։ Հիշում է, որ ջազով հետաքրքրվել է երեք տարեկանում և այդ օրվանից սկսել է ապրել երաժշտության հետ։
Ջազմենը երկրորդ անգամ է Հայաստանում, և իր երկու այցի ընթացքում էլ նրան անչափ զարմացրել է հայ հանդիսատեսը։
«Երբ ես ելույթ ունեցա Երևանում, ինձ զարմացրեց այն, որ հանդիսատեսն ինձ հետ երգում էր գրեթե բոլոր իմ երգերը, այն էլ` օտար լեզվով», — ասում է Բոնան։
Ռիչարդ Բոնան համաշխարհային ճանաչում ունեցող հայտնի բասիստ է։ Երկար տարիներ շարունակ աշխատել է ջազի հսկաների հետ, որոնցից են Մայք Ստեռնը, Չիկ Կորիան, Լարի Կորայելն ու ուրիշները։
Երևանում Բոնան ելույթ կունենա հայտնի ջազմեն Լևոն Մալխասյանի և այլ երաժիշտների հետ։
