ԵՐԵՎԱՆ, 30 ապրիլի — Sputnik. Ավելի վաղ ԶԼՄ-ները, «Եվրատեսիլի» կազմակերպիչներին հղում անելով, հայտնել էին, որ մրցույթում արգելվում է ծածանել որոշ չճանաչված տարածաշրջանների` Բասկերի երկրի, ԼՂՀ-ի, Պաղեստինի, Կոսովոյի, Ղրիմի, Հյուսիսային Կիպրոսի թուրքական հանրապետության, ինքնահռչակ Դոնեցկի ժողովրդական հանրապետության և Մերձդնեստրի դրոշները:
Բասկերի երկրի առկայությունն այդ շարքում Իսպանիայի իշխանությունների տարակուսանքն ու դժգոհությունն էր առաջացրել: Վերջինները հիշեցրել էին, որ այդ դրոշը երկրի ինքնավար համայնքներից մեկի պաշտոնական խորհրդանիշն է և պահանջել էին շտկել սխալը:
Արցախյան դրոշի մասին հիշատակումն էլ բուռն քննարկումների թեմա էր դարձել Հայաստանում: «Եվրատեսիլի» հայկական պատվիրակությունը հայտարարել էր, որ անտեսելու է այդ որոշումը և Արցախի դրոշն իր հետ Ստոկհոլմ է տանելու:
EBU-ն կարգադրել է Globe Arena-ի և տոմսերի վաճառքի AXS կայքից հեռացնել արգելված դրոշների մասին տեղեկությունը, ասվում է «Եվրատեսիլի» հայտարարության մեջ:
Առաջիկայում այդ էջերում, ինչպես նաև Eurovision.tv-ի պաշտոնական էջում կտեղադրվի ճիշտ տեքստը՝ մրցույթում արգելված խորհրդանիշների մասին:
EBU-ն նաև ներողություն է խնդրել նրանցից, ում զգացմունքները ոտնահարվել են ցանկի հրապարակման պատճառով:
«Եվրատեսիլ-2016» մրցույթին Հայաստանը կներկայացնի Իվետա Մուկուչյանը: Նա հանդես կգա «LoveWave» երգով: Հայաստանը ելույթ կունենա 1-ին կիսաեզրափակչի ընթացքում` 7-րդ համարի ներքո: Եվրատեսիլ 2016-ին կմասնակցի 43 երկրի ներկայացուցիչ: Մրցույթի կարգախոսն է Come together (Միավորվենք):
