ԵՐԵՎԱՆ, 2 մայիսի — Sputnik. Սուրճն ու գինին դրական ազդեցություն են ունենում մարդու օրգանիզմի վրա և ավելացնում են աղիքներում առկա օգտակար բակտերիաների քանակը, այն դեպքում, որ օրինակ կաթը հակառակը` կարող է նվազեցնել դրանց պարունակությունը։ Նման եզրակացության են եկել հոլանդացի գիտնականները, գրում է ՌԻԱ Նովոստին` հղում անելով EurekAlert պարբերականին։
Ուսումնասիրության հիմք է հանդիսացել աղիքի ֆլորան կազմող մանրէների ԴՆԹ-ի ուսումնասիրությունը։ Հետազոտությանն ավելի քան 1100 մարդ է մասնակցել։
Այս վերլուծությունը թույլ կտա ուսումնասիրել, թե ինչ գործոններ են ազդում միկրոբիոմի (աղիքային ֆլորա, որը յուրաքանչյուր մարդու մոտ բացառիկ է) բազմազանության վրա, գրում է պարբերականը։ Գիտնականները եզրակացրել են, ովքեր պարբերաբար յոգուրտ կամ թան են օգտագործում, նրանց աղիքային մանրէների բազմազանությունն ավելի մեծ է։ Ընդ որում` դրանց քանակը կարող է ավելանալ գինի կամ սուրճ օգտագործելու դեպքում։
«Մենք հայտնաբերել ենք ընդամենը 60 դիետիկ գործոն, որոնք ազդում են օգտակար մանրէների բազմազանության վրա։ Կոնկրետ ինչ նշանակություն ունեն դրանք, դեռ դժվար է ասել։ Բայց աղիքային ֆլորայի բազմազանությունն ու առողջությունը սերտորեն փոխկապակցված են միմյանց. որքան բազմազան, այնքան ավելի լավ», — ասում է գիտնական Ալեքսանդրա Ժերնակովան։
Հեղինակներն ընդգծում են, որ իրենց վերլուծությունը բացառիկ է, քանի որ ուսումնասիրել են առողջ մարդու աղիքային միջավայրը, իսկ նախկինում ուսումնասիրվել են միայն աղեստամոքսային համակարգի որոշակի հիվանդությունով տառապող մարդիկ։
«Սովորաբար գիտնականներն ուսումնասիրում են ԴՆԹ-ի կոնկրետ մի հատված, որտեղ կարելի է մանրէների տարբեր խմբեր առանձնացնել։ Իսկ մենք համեմատել ենք ԴՆԹ-ի բոլոր մանրէները, որպեսզի դրանց տեսակների վերաբերյալ ավելի մանրամասն տեղեկություն ստանանք», — ասում են ուսումնասիրության հեղինակները։
