ԵՐԵՎԱՆ, 4 մայիսի — Sputnik. Ղրիմի Թեոդոսիա քաղաքում վերսկսվել են Սուրբ Գևորգ եկեղեցու վերականգնման աշխատանքները, այն Գևորգյան վանական համալիրի գլխավոր եկեղեցին է, հայտնում է Ղրիմ Press-ը։
Վերականգնողական աշխատանքներն իրականացնում է քաղաքի հայկական համայնքը։ Արդեն վերանորոգվել է կամարը, այժմ ծածկի վերանորոգման աշխատանքներն են տարվում։
Թեոդոսիայի հայկական եկեղեցիների վանահայր Երեմիայի խոսքով` շինարարավերականգնողական աշխատանքները կտևեն մինչև մայիսի վերջ, այնուհետև կդադարեցվեն և կվերսկսվեն արդեն աշնանը։
«Մենք վերականգնեցինք կամարները։ XX դարում եկեղեցին օգտագործվել է որպես պահեստ։ Այն ժամանակ տանիքի վրա դրվել էր մետաղական կոպիտ ծածկույթ, որը մենք այժմ փոխարինում ենք կղմինդրասալիկներով: Տաճարի հատակը ծածկված չէ, այնտեղ հող է, այդ պատճառով երբ ավարտվեն արտաքին աշխատանքները, մենք կանցնենք ներքին հարդարման աշխատանքներին», — ասաց հոգևորականը։
Ապագայում նախատեսվում է բարեկարգել նաև եկեղեցու տարածքը և երկաթյա ցանկապատով պարսպապատել։
