ԵՐԵՎԱՆ, 4 մայիսի- Sputnik. Պաշտպանության նախարար Սեյրան Օհանյանը հայտնեց, որ իրավիճակի համապատասխան վերլուծություն է կատարվում, որին հաջորդում են համապատասխան հետևությունները։
«Իհարկե, իրավիճակն առաջնային գծում այսօր լարված է, և ցանկացած պահի կարող են ցանկացած գործողություններ լինել։ Տվյալ պահին պահպանվում է ժամանակավոր հրադադարը»,- ասաց Օհանյանը։ Միաժամանակ նա ընդգծեց, որ հայկական բանակն` ի դեմս Ղարաբաղի ՊԲ-ի, բարձր մակարդակով կատարում է իր գործառույթները։
Նա վստահեցրեց, որ ԼՂ պաշտպանության բանակը իր առջև դրված խնդիրները իրականացնում է բարձր մակարդակով: «Պաշտպանության բանակը պատրաստ է պաշտպանողական և այլ խնդիրների իրականացմանը»,- ընդգծեց նախարարը:
Օհանյանն անդրադարձավ նաև Ռուսաստանից առաքվող զենքի թեմային։ Նրա խոսքով` ռազմատեխնիկական համագործակցության շրջանակում տարվում են համապատասխան աշխատանքներ` առաքումների տեմպերն արագացնելու համար։
ՊՆ ղեկավարը պատասխանեց նաև լրագրողների հարցերին պաշտոնանկ արված բարձրաստիճան զինվորականների մասին։
«Բանակում իրականացվում է ծրագրված քաղաքականություն։ Այդ պաշտոնանկությունները, իհարկե, իրավիճակով են պայմանավորված և ուղղված են կառավարման արդյունավետության բարձրացմանը։ Նրանք քրեական պատասխանատվության չեն ենթարկվի։ Նրանց գործունեության համար քրեական պատասխանատվություն չի նախատեսվում»,- ասաց Օհանյանը։
Նա նշեց, որ պետք է ուշադրություն դարձնել ոչ թե կադրային փոփոխություններին, այլ որ Ղարաբաղի պաշտպանության բանակը լիովին կատարել է իր առջև դրված խնդիրները, հասել հաջողության, հակառակորդին զրկել մարտավարական առավելությունից։
