ԵՐԵՎԱՆ, 5 մայիսի — Sputik. ՀՀ կառավարությանն այսօրվա նիստում հավանության արժանացրեց «Հրազդան-Ցեմենտ» ՓԲԸ-ին հարկային և պարտադիր սոցիալական ապահովագրության վճարների գծով առաջացած տույժերից ազատելու մասին» ՀՀ օրենքի նախագծին։ Նախագիծը ներկայացնող էկոնոմիկայի նախարար Արծվիկ Մինասյանը հայտարարեց, որ առաջին անգամ այս նախագիծն ԱԺ-ում չի ընդունվել տեխնիկական պատճառներով:
Իսկ նիստի ավարտին, պատասխանելով լրագրողների հարցերին, Արծվիկ Մինասյանը կարծիք հայտնեց, որ կառավարության այս նախաձեռնությունը բազմաթիվ խնդիրներ է լուծում։
«Ոչ միայն մրցակցային միջավայրի ստեղծման ուղղությամբ, որ չունենանք միայն մեկ ցեմենտ արտադրող խոշոր գործարան, այլ նաև տնտեսական ակտիվության վրա դրական ազդեցություն ունեցող նախաձեռնություն է, սոցիալական խնդիր ունեցող նախաձեռնություն է, և, ի վերջո, ՀՀ տնտեսական, արդյունաբերական գիգանտներից մեկը փրկելու նախաձեռնություն է»,- ասաց Արծվիկ Մինասյանը։
Ներկայացված նախագծով կառավարությունն առաջարկում է «Հրազդան-ցեմենտ» ընկերությանն ազատել հարկային և պարտադիր սոցիալական ապահովագրության գծով առաջացած տույժերից։
Իսկ 2016թ.-ի փետրվարի 1-ի դրությամբ գործարանի պարտքը կազմում է 504 923 400 դրամ, որից 303 800 600-ը` ավելացված արժեքի գծով, 35 645 800-ը`եկամտահարկի, 41 427 500-ը` եկամտային հարկի, 36 071 600-ը` շահութահարկի և 87 977 900 դրամը` պարտադիր սոցիալական ապահովագրության վճարների գծով:
Հիշեցնենք, նույն օրինագիծը 2016 թվականի ապրիլի 26-ին ԱԺ-ում չէր ընդունվել, քանի որ ՀՀԿ խմբակցությունը չէր կարողացել քվորում ապահովել։
Այս անգամ կառավարությունն օրինագիծն ԱԺ կներկայացնի արտահերթ կարգով։ Ինչպես տեղեկացրեց կառավարության աշխատակազմի ղեկավար–նախարար Դավիթ Հարությունյանը, այն ընդգրկվել է մայիսի 10-ին, ժամը 12։00-ին, կառավարության առաջարկով հրավիրվող ԱԺ արտահերթ նիստի օրակարգում։
