ԵՐԵՎԱՆ, 5 մայիսի — Sputnik. Երևանը ներկայացվել է Թբիլիսիում անցկացված տուրիզմի միջազգային 18-րդ Կովկասյան զբոսաշրջային ցուցահանդեսին («Caucasus Tourism Fair CTF 2016»), հայտնում են Երևանի քաղաքապետարանի մամուլի ծառայությունից:
Երևանը ցուցահանդեսին մասնակցել է իր առանձին տաղավարով, որտեղ ներկայացվել են մայրաքաղաքի՝ որպես զբոսաշրջային նախընտրելի ուղղության առանձնահատկությունները: Երևանի տաղավարում ցուցահանդեսին ներկայացվել է նաև զբոսաշրջային 4 գործակալություն:
Երեք օր շարունակ Երևանն ու մասնակից մյուս քաղաքները հնարավորություն են ունեցել ներկայացնել տարածաշրջանում իրենց մրցունակությունը, ինչպես նաև զբոսաշրջության ոլորտում փոխշահավետ համագործակցության հնարավորությունները:
Նրա խոսքով` աշխարհում ընդունված հանգստյան օրերի կարճատև ճամփորդությունների ցանկում ևս վրացի զբոսաշրջիկների համար Երևանը լիովին նախընտրելի ուղղություն կարող է դառնալ:
Թոխալյանը տեղեկացրել է նաև, որ ցուցահանդեսի շրջանակում գործընկեր քաղաքների հետ ձեռք են բերվել որոշակի պայմանավորվածություններ՝ համագործակցության ընդլայնման և դեպի Երևան տուրիզմի զարգացման ուղղությամբ:
Երևանի քաղաքապետարանի տուրիզմի բաժինը մասնակցել է նաև «Caucasus Tourism Fair CTF 2016» ցուցահանդեսի շրջանակում անցկացվող միջազգային համաժողովին:
Երևանի քաղաքապետարանը ցուցահանդեսին մասնակցել է Թբիլիսիի քաղաքապետարանի հրավերով:
Միջոցառմանը մասնակցել է զբոսաշրջային և հյուրանոցային բիզնեսի ավելի քան 100 ընկերություն՝ Հայաստանից, Վրաստանից, Էստոնիայից, Ինդոնեզիայից, Թայլանդից և մի շարք այլ երկրներից:
