ԵՐԵՎԱՆ, 6 մայիսի — Sputnik. Աշխարհում հայտնի ամենահին քարտեզը բաբելոնյան է և պատկանում է մ.թ.ա. 3-1 դարերին։ Վահե Անանյանի հնագույն քարտեզների հավաքածուի հնագույն քարտեզը թվագրվում է մ.թ. 2-3-րդ դարերին։ Եվ դրանում աշխարհի հնագույն երկրների կողքին պատկերված է նաև Հայաստանը։
«Այդ օրից սկսած` աշխարհի որ երկրում էլ լինեի, փնտրում էի, գտնում նման քարտեզներ։ Գրադարաններում, թանգարաններում ձեռք էի բերում դրանց կրկնօրինակները, աճուրդներում գնում էի իրական քարտեզները։ Արդյունքում այսօր արդեն 2500 քարտեզներից բաղկացած հավաքածու ունեմ։ Ու բոլոր այդ քարտեզներում հիշատակված է նաև Հայաստանը»,- ասում է Վահե Անանյանը:
Նա այսօր իր հավաքածուն ներկայացրել է լայն հանրությանը։ Երևանյան գրախանութներից մեկում մեկ շաբաթ շարունակ այցելուները հնարավորություն կունենան անձամբ տեսնելու Հայաստանի հնագույն պատմության ու տարածքների մասին փաստացի ապացույցները։
«Հետաքրքիր է, որ անգամ 20-րդ դարի 2-րդ կեսում Հայաստանը մի շարք քարտեզների վրա նշված է ոչ թե որպես ԽՍՀՄ հանրապետություն, այլ որպես տարածաշրջանում հզոր աշխարհաքաղաքական նշանակություն ունեցող երկիր»,- ներկայացնելով հավաքածուի որոշ նմուշները` պատմեց Վահե Անանյանը։
Ցուցահանդեսի նախաձեռնող, «Այաս» ակումբի անդամ Վարդան Գասպարբեկյանը, չբացելով փակագծերը, տեղեկացրեց, որ ցուցահանդեսը մի մասն է այն խոշոր նախագծի, որն ակումբը պատրաստվում է իրականացնել մոտ ապագայում։
