ԵՐԵՎԱՆ, 6 մայիսի- Sputnik, Դավիթ Գալստյան. Առաջին թեմատիկ նամականիշի ստեղծման օրը Sputnik Արմենիան «Հայփոստ» ընկերության ֆիլատելիայի բաժնի պետ Աննա Ղուկասյանի հետ զրուցեց ժամանակակից հայկական նամականիշների մասին։
«Բոլորիս շնորհավորում եմ, քանի որ հենց այս օրը` 1840թ.-ի մայիսի 6-ին, Մեծ Բրիտանիայում թողարկվեց առաջին փոստային նամականիշը` «Սև պեննին»»,- ասաց Ղուկասյանը։
Նա հավաստիացրեց, որ «Հայփոստն» իրենից կախված ամեն ինչ անում է` ֆիլատելիան բարձր մակարդակում պահելու և դրա նկատմամբ լրացուցիչ ուշադրություն գրավելու համար, քանի որ այս ոլորտում հետաքրքրությունը բնական պատճառներով նվազում է։
Ինչ վերաբերում է հայկական նամականիշներին, ապա նրա խոսքով`շատ երկար ժամանակ, երբ Հայաստանը գտնվել է Ռուսական կայսրության կազմում, մենք ցարական նամականիշներ ենք օգտագործել։ Սեփական նամականիշ թողարկելու փորձն արվել է արդեն Առաջին հանրապետության ժամանակ, էսքիզների հեղինակներ էլ եղել են Արշակ Ֆեթվաճյանն ու Հակոբ Կոջոյանը, սակայն իշխանությունը փոխվել է, և նամականիշներն այդպես էլ չեն մտել շրջանառության մեջ։
«Անցած տարին առանձնահատուկ էր հայ ժողովրդի համար։ Հայոց ցեղասպանության 100-րդ տարելիցի կապակցությամբ մենք բուկլետ էինք պատրաստել, որում անմոռուկների տեսքով նամականիշներ, փոստային բացիկ ու ծրար էր դրված։ Տարբեր գների նամականիշներ էինք դրել, որպեսզի դրանք շրջանառվեն ոչ միայն Հայաստանում, այլ նաև արտասահման ուղարկվեն»,- ասաց Ղուկասյանը։
Նամականիշների այս շարքում ներկայացված են Հայոց ցեղասպանության հետ կապված իրադարձություններն ու այն մարդիկ, ովքեր անտարբեր չեն մնացել այդ ողբերգության նկատմամբ։ Աննայի խոսքով` իրենք լուրջ աշխատանք են կատարել և ներկայացրել այն հասարակությանը։
Կան, օրինակ, Հենրի Մորգենթաուին, Յոհաննես Լեփսիուսին նվիրված նամականիշներ։ Նամականիշներից մեկում էլ Ավրորա Մարդիգանյանն է պատկերված, որի անունով է կոչվել Aurora Prize առաջին մարդասիրական մրցանակը։
Հայոց ցեղասպանության 100-րդ տարելիցի շրջանակում ևս մի հետաքրքիր աշխատանք է կատարվել։ Թողարկվել է շրջանակային պերֆորացիայով հատուկ նամականիշ (սովորաբար այն լինում է քառանկյունաձև), որը նվիրված է Ցեղասպանությունը վերապրած մարդկանց ուղղված բարեգործության թեմային։
Ղուկասյանը հայտնեց, որ 2012թ.-ից հայոց այբուբենին նվիրված նամականիշներ են տպագրվում։
Երևանում PostEurope-ի նիստին նվիրված նամականիշի մարումն էլ վերջերս է եղել։
«Հետաքրքիր է, որ նամականիշն իրենից ներկայացնում է Մեծ և Փոքր Արարատի յուրահատուկ պատկերը, ինչպես նաև միմյանց վրա դրված երկու նամականիշներ»,- ասաց Ղուկասյանը։
Անցած տարի ընկերությունը թողարկել է երկու նամականիշ, մեկը նվիրված է Հայրենական մեծ պատերազմին, երկրորդը` Միսաք Մանուշյանին։ Դրանք երկուսն էլ նվիրված են Երկրորդ աշխարհամարտում հայերի ունեցած ավանդին։
2012թ.-ին «Եվրոպա» նախագծի շրջանակում մենք թողարկել ենք նամականիշ` նվիրված միջնադարյան Տաթևի համալիրին։ Նամականիշի հետ թողարկված կտրոնի վրա էլ ճոպանուղին է պատկերված։
