ԵՐԵՎԱՆ, 10 մայիսի- Sputnik. 200 միլիոն դոլար արժողությամբ ռուսական արտահանման վարկի շրջանակում սպառազինության ձեռք բերման և առաքման գործընթացը շարունակվում է, լրագրողներին ասաց Հայաստանի խորհրդարանի փոխխոսնակ Էդուարդ Շարմազանովը։
Նրա խոսքով`այդ միջոցներով ձեռք բերվող սպառազինությունը կառաքվի Հայաստան։
«Հայաստանը և Ռուսաստանը ռազմավարական դաշնակիցներ են։ Անկախ Ռուսաստանի և Ադրբեջանի հարաբերություններից` մենք պետք է զարգացնենք ՌԴ-ի հետ դաշնակցային հարաբերությունները։ Հայաստանի համար դա շատ կարևոր է»,- ասաց Շարմազանովը։
Փոխխոսնակը մեկնաբանեց նաև Հայաստանում Ռուսաստանի դեսպան Իվան Վոլինկինի հայտարարությունն Ադրբեջանին զենք վաճառելու իրավիճակի մասին։ Մայիսի 9-ին լրագրողների այն հարցին, թե ինչու է Ռուսաստանը շարունակում զենք վաճառել Ադրբեջանին, Վոլինկինը խնդրել է փաստաթղթեր տրամադրել, որտեղ կհաստատվի այդ փաստը։
Նրա խոսքով` պետք չէ կենտրոնանալ նրա վրա, թե ով ում հետ է համագործակցում, այլապես, ելնելով այդ տրամաբանությունից, Հայաստանը չպետք է զարգացներ հարաբերություններն ԱՄՆ-ի հետ, քանի որ այն Թուրքիայի դաշնակիցն է։
Նա ևս մեկ անգամ հիշեցրեց, որ վերջին տարիներին ոչ մի երկիր Հայաստանին նման ծավալների ռազմական աջակցություն չի ցուցաբերել, ինչպես Ռուսաստանը։
