ԵՐԵՎԱՆ, 12 մայիսի — Sputnik. Ռուսաստանցիները հավատում են, որ իրենց պետությունը կարող է օգնել Լեռնային Ղարաբաղի հակամարտության խաղաղ կարգավորմանը։ Ընդ որում, նրանք կողմ են Ղարաբաղի անկախացմանը։ Հասարակական կարծիքի ուսումնասիրության համառուսաստանյան կենտրոնի իրականացրած հարցմանը մասնակցել է 1.6 հազար մարդ Ռուսաստանի 46 շրջանի 130 բնակավայրից։
Սոցիոլոգները հարցրել են` արդյո՞ք տեղյակ են, որ Լեռնային Ղարաբաղի հակամարտությունը սրվել է։ Պարզվել է, որ այդ 72 տոկոսը լսել է այդ մասին։ Այս ցուցանիշն էապես տարբերվում է 2014 թվականի ցուցանիշից (45%)։
Հակամարտության խաղաղ կարգավորումն այսօր հնարավոր է համարում ռուսաստանցիների 71 տոկոսը (2014 թվականի 57-ի փոխարեն)։ Ընդ որում, 15 տոկոսը դրան չի հավատում։ Բացասական կանխատեսումներ են արել Մոսկվայի և Սանկտ Պետերբուրգի բնակիչները (20%), ինչպես նաև ոչ խորհրդարանական կուսակցությունների կողմնակիցները։
Այսօր 44 տոկոսը կարծում է, որ արյունահեղությանը վեջ տալու համար Ռուսաստանը պետք է որպես միջնորդ հանդես գա։ Երկու տարի առաջ նման դիրքորոշում ուներ բնակչության մեկ քառորդը (25%)։
36 տոկոսը կարծում է, որ Ռուսաստանը պետք է չեզոք դիրք զբաղեցնի և դիտորդի դեր ստանձնի։ 2014 թվականին այս ցուցանիշը հասնում էր 60 տոկոսի։
Հայաստանին և Լեռնային Ղարաբաղի ղեկավարությանն աջակցելը նպատակահարմար է համարում 4 տոկոսը, Ադրբեջանին` 2 տոկոսը։
Հարցվածների 26%-ը կարծում է, որ Լեռնային Ղարաբաղն անկախ պետություն է, 11%-ը համարում է, որ Ղարաբաղը Ադրբեջանի մի մասն է, իսկ 13%-ն այն Հայաստանի տարածք է համարում։ Մեծամասնությունը (47%) դժվարանում է որոշել ԼՂՀ տարածքային պատկանելությունը։
35%-ը կարծում է, որ ելնելով Ռուսաստանի ազգային շահերից` հակամարտությունը լուծելու լավագույն տարբերակը ԼՂՀ անկախության ճանաչումն է։ Գրեթե յուրաքանչյուր տասներորդը (9%) կարծում է, որ Ռուսաստանի շահերից է բխում այն, որ ԼՂՀ-ն Հայաստանի մաս դառնա։ Ընդ որում, 18%-ը կարծում է, որ Ռուսաստանի համար Լեռնային Ղարաբաղի ճակատագիրը նշանակություն չունի։
Համառուսաստանյան կենտրոնի տնօրեն Վալերի Ֆյոդորովը նշել է, որ հայ-ադրբեջանական հերթական թեժացումը մեծ ուշադրության է արժանացել ռուսաստանցիների կողմից։
«Հարցման մասնակիցներին հակամարտությունն առանձնապես չի հետաքրքրում, և նրանք կողմերից որևէ մեկին միանշանակ աջակցելու հակված չեն։ Այն դերը, որ մենք կարող ենք ունենալ այս իրավիճակում, խաղաղ հակամարտության միջնորդ դառնալն է։ Ռուսաստանցիները համարում են, որ հակամարտությունն անլուծելի չէ», — նշել է Վալերի Ֆյոդորովը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։