ԵՐԵՎԱՆ, 12 մայիսի — Sputnik. Իվետա Մուկուչյանը լավ է արել, որ ծածանել է Արցախի դրոշը, գուցե հաջորդ անգամ դա լինի Մեծ Հայքի դրոշը, հինգշաբթի ՀՀԿ Գործադիր մարմնի նիստից հետո հայտարարեց ՀՀԿ խոսնակ, Աժ փոխնախագահ Էդուարդ Շարմազանովը։
«Շատ լավ եմ նայում, շատ էլ ճիշտ է արել, գուցե, մի անգամ էլ Մեծ Հայքի ու Տիգրան Մեծի ժամանակաշրջանի Հայաստանի դրոշը ծածանի կամ Արևմտյան Հայաստանի»,- նշեց Էդուարդ Շարմազանովը` պատասխանելով ինչպես է նայում Մուկուչյանի քայլին հարցին:
12 մայիսի 2016, 18:32
«Եվրատեսիլ» միջազգային մրցույթում Հայաստանը ներկայացնող երգչուհի Իվետա Մուկուչյանն առաջին կիսաեզրափակչի ժամանակ ծածանեց ոչ միայն Հայաստանի, այլև Արցախի դրոշը, քանի որ մրցույթի կազմակերպիչներն այս տարի որոշել էին մեղմացնել դրոշների իրենց քաղաքականությունը։ Սակայն Եվրոպական հեռարձակողների միությունը Հայաստանին պաշտոնապես նախազգուշացրեց, որ եթե ԼՂՀ դրոշը դարձյալ ցուցադրի «Եվրատեսիլ» մրցույթի ժամանակ, Հայաստանը` որպես մասնակից երկիր, կարող է որակազրկվել և զրկվել հետագա տարիներին մրցույթին մասնակցելու իրավունքից: Ինքը` Իվետան, ասուլիսի ժամանակ մեկնաբանել էր իր քայլը` ասելով, որ խաղաղություն է ցանկանում աշխարհի և Հայաստանի համար։
Ուշագրավ է` լսելով, որ հարցը Եվրատեսիլի մասին է, Շարմազանովը սկզբում առաջարկեց` «Եվրատեսիլի մասով` Աշոտյանին»:
